-Utoqqaat nunaqarfinni sumiiffinnilu avinngarusimasuniittut inuunerannik pitsanngorsaanissamut
politikkikkut suliniutit erseqqaserluppallaarput.
Utoqqaat Illersuisuata, politikkikkut suliallit eqqarsaqqinnissaannik tinnersarpai, utoqqaat
sumiiffinni avinngarusimasuniittut nunaqarfinniittullu, pissutsit atugaat pillugit
pitsanngorsaasoqarnissaa salliunneqarniassammat, aningaasaleeriaaseq pillugu
pingaarnersiuisoqaqqittariaqalermat.
Naalagaaffiit Peqatigiit Nunarsuaq Tamakkerlugu Utoqqarnut Ullorititaanut atatillugu, taavalu
Utoqqaat Illersuisuata Upernavimmut angalanerminit nalunaarusiami saqqummersinneqarneranut
atatillugu Utoqqaat Illersuisuat taama oqaaseqarpoq.
1. oktoberi tassaavoq Naalagaaffiit Peqatigiit Nunarsuaq Tamakkerlugu Utoqqarnut Ullorititaa.
Naalagaaffiit Peqatigiit Nunarsuaq Tamakkerlugu Utoqqarnut Ullorititaa ukiut tamaasa oktobarip
aallaqqaataani malunnartinneqartarpoq. Ullormi tassani utoqqaat, inuiaqatigiit, peqatigiiffiit
Naalagaaffiit Peqatigiinniittut ilaasortaasullu utoqqarnut atugassarititaasut, nunarsuaq
tamakkerlugu ineriartortinneqarnissaa oqaluuserisassanngortittarpaat.
Ukiut tamaasa immikkut qulequtaqartarpoq, ukiorlu manna “Qanorluunniit ukioqaraluaraanni
naligiinnerulernissamut aqqut” qulequtarineqarpoq.
Utoqqarnut Ullorititamut atatillugu Utoqqaat Illersuisuat ima oqaaseqarusuppoq: Qanorluunniit
ukioqaraluaraanni aamma sumiluunniit najugaqaraluaraanni naligiinnerunissamut
aqqutissiuisoqassappat, Kalaallit nunaanni utoqqarnut sumiiffinni
avinngarusimasuniittunut nunaqarfinniittunullu pissutsit pitsanngorsarnissaannik
politikkikkut pitsanngorsaasoqartariaqarpoq.
Nuna tamakkerlugu utoqqarnut atugassarititaasut assigiinngiiaarpallaarput apeqqutaatillugu sumi
najugaqarnersut.
Ulloq manna tikillugu Kalaallit Nunaanni utoqqaat sumiiffinni avinngarusimasuniittut
nunaqarfinniittullu napparsimaleraangamik sanngiilligaangamillu nunagisaminnit
pinngitsaalisaallutik nuutsitaasarput. Tamanna pisarpoq inissiat utoqqarnut tulluarsakkat
najugaqarfiini sanaartorneqarneq ajormata. Kiisalu nunaqarfinni
utoqqarnik sanngiinnerusunillu paaqqutarinnittussanik sulisussaqanngimmat.
Utoqqaat nunagisaminnit sungiusimasaminnillu nuutsitaagaangamik kiserliorneq aliasunnerlu
misigisarpaat. Utoqqarnut atugassarititaasunut suliniutit erseqqaserluppallaaqaat, tamanna Utoqqaat
Illersuisuata maajimi 2022-mi Upernavimmut angalanerminit nalunaarusiaani atuarneqarsinnaavoq.
– Nalunngilara utoqqaat sanngiinnerit napparsimasullu nunaqarfinniit sumiiffinniillu
avinngarusimasuniit illoqarfinni utoqqaat illuinut pinngitsaalillugit nuutsinneqarnissaat
pisariaqartartoq. Kisianni taamaassappat, politiikeritta aamma qulakkeertariaqarpaat, utoqqaat
illoqarfinni utoqqaat illuinut nuutsinneqartut pitsaanerpaamik sinaakkuteqassammata inuunermillu
nalituumik tunineqassallutik.
Tassunga ilaavoq utoqqaat ilaquttatik qaninnerit nunaqarfinnut sumiiffinnullu
avinngarusimasuniittut qimatatik takunissaannut periarfissaqartarnissaat, kiserliornermik
eqqarsartaatsimikkullu nikallornermik eqqugaannginniassagamik,
Utoqqaat Illersuisuat oqarpoq.