Utoqqarnut imaluunniit innarluutilinnut inissiaq
Utoqqarnut imaluunniit innarluutilinnut inissiaq
Utoqqarnut imaluunniit innarluuteqartumut inissiaq naleqqussagaq tassaavoq inissiaq illuluunniit utoqqaap innarluutillilluunniit pineqartup pisariaqartitaanik aallussisinnaajumalluni immikkut ittumik ilusilersorneqarsimasoq. Pissarsiarineqarsinnaaneranut atatillugu piumasaqaatit assigiinngitsut pigineqarput, assersuutigalugu:
- Inissiaq illuluunniit majuartarfeqanngivissoq aamma issiavinnut kaassuartakkanut atuisunut naleqquttumik matulik
- Inissiaq illuluunniit matumut silarlermut atasunik majuartarfikitsoq, issiavinnut kaassuartakkanut atuisunut imaluunniit ajaperfinnut assakaasulinnut atuisunut aqqusiornissamut periarfissalik
Inuup timikkut piginnaasai aallaavigalugit inissiaq illuluunniit matumut silarlermut killilimmik amerlassusilinnik majuartarfeqarsinnaavoq, ajaperfissat naleqqussakkat aamma ilaassallutik.
Utoqqaap imaluunniit innarluutillip inaanut sulisunik attuumassuteqartunik peqartoqartanngilaq. Taamaammat annertunerusumik ikiorneqarniaraanni, angerlarsimaffimmi ikiorti imaluunniit taamaaqataanik immikkoortortaqarfik kommunimut atasoq attaveqarfigineqarsinnaavoq.
Piumasaqaatit
Utoqqarnut innarluutilinnullu inissiat tassaapput, innuttaasunut tamanut timikkut piginnaassutsikkut appasissumik piginnaaneqalersimasunut inissianik atorfissaqartitsisunut atugassiat, inuup timikkut piginnaassuseqarneranut naleqqussarneqarsimasut. Tassa imaappoq:
- Utoqqarnut imaluunniit innarluutilinnut pisariaqartitsisunut naleqquttumik isertarfilersorsimassapput inissiallu pitsorluttunut ilusilersukkanik naleqqussarneqarsimassallutik
- Utoqqarnut imaluunniit innarluutilinnut timikkut tarnikkullu aalajaatsumik atugalinnut naleqqussarneqarsimassapput
- Utoqqarnut imaluunniit innarluutilinnut inimik mikinerusumik pisariartitsisunut naleqqussarneqarsimassaaq
- Utoqqarnut imaluunniit innarluutilinnut angerlarsimaffimmi ikiortimik tapersersorneqarluni ulluinnarni ingerlatsisinnaasunut naleqqussarneqasimassaaInuit tarnikkut innarluutillit timikkullu piginnaasakillisimanngitsut, utoqqarnut imaluunniit innarluutilinnut inissiamik pissarsisinnaanngillat.
Ineqarnermut akiliut
A/S INI-p ineqarnermut akiliutip annertussusissaa aalajangertarpaa.
Qinnuteqarneq
Utoqqarnut imaluunniit innarluutilinnut inissiamik qinnuteqarniaruit, angerlarsimaffimmi ikiorti imaluunniit kommunimi sulianik suliarinnittartoq peqatigalugu kommunip utoqqarnut immikkoortortaqarfiani qinnuteqarnermut immersuiffissaq immersorsinnaavat. Qinnuteqarnermi immersuiffissaq kommunimi pissarsiarisinnaavat.
Qinnuteqarnermi immersuiffissamut ilanngutissavatit:
- Peqqissutsimut aamma nakorsamit paasissutissat
- Atortut ikiorsiissutaasartut atornerannut uppernarsaat
Qinnuteqarnermi immersugassaq ilanngussassanik ilaqartoq kommunimi illit sulianik suliarinnittartunnut tunniutissavat.
Nalilersuineq
Qinnuteqaatit kommunip tigoriaruniuk, nalilersuinermut ataatsimiititaliap illit nammineq angerlarsimaffinniiginnarsinnaanersutit nalilersussavaa. Ikiorsiissutinik allanik pissarsinikkut, assersuutigalugu inissiap allanngortiternissaanut ikiorsiineq, atortut ikiorsiissutit, angerlarsimaffimmi ikiorti imaluunniit ulluunerani paaqqutarineqarnissamik neqeroorut, imminut isumagisinnaanersutit ilaatigut nalilersuinermut ataatsimiititaliamit pingaartinneqassaaq.
Utaqqisut allattorsimaffiat
Utoqqaat ataatsimoorlutik najugaqarfiinut, utoqqaat angerlarsimaffiinut aamma paaqqutarineqarluni angerlarsimaffinnut utaqqisut allattorsimaffii pigineqarsinnaasarput. Tamatuma kingunerisaanik inissamik erngertumik tunineqarnissat naatsorsuutigisinnaanngilat, naak nalilersuinermut ataatsimiititaliap inissamik innersuussimagaluaraatit. Inissaqanngippat utaqqisut allattorsimaffiannut allanneqassaatit. Utaqqisut allattorsimaffianni inissisimanerit tikkuussisuuginnassaaq, tassa utoqqaat angerlarsimaffianni imaluunniit paaqqutarineqarluni angerlarsimaffimmi inissaq pisariaqartitsinerpaamut neqeroorutigineqartarmat.
Inissiamik utaqqinivit nalaani ikiorsiissutinik allanik neqeroorfigineqassaatit, illit ulluinnarisanni pitsaanerusunik atugaqarsinnaaniassagavit.
Qeqqata Kommunia
Kommunini kisiartaalluni Qeqqata Kommunia utoqqaat angerlarsimaffiat aamma paaqqutarineqarluni angerlarsimaffik kiisalu utoqqarnut inissiat pillugit najoqqutassiorsimavoq uani atuarsinnaasannik (danskisut allassimavoq).
Inatsisit