Utoqqaat angerlarsimaffiat aamma paaqqutarineqarluni angerlarsimaffik
Utoqqaat angerlarsimaffiat aamma paaqqutarineqarluni angerlarsimaffik
Utoqqaat angerlarsimaffiat paaqqutarineqarluniluunniit angerlarsimaffik utoqqarnut 65-ileereersimasunut angerlarsimaffigisami paaqqutarineqarnermit annertusunerumik pisariaqartitsisunut naatsorsuussaapput. Angerlarsimaffinni taakkunani najugallit taakkunani najugaqartualersarput aamma ulloq unnuarlu sulisoqarfiupput.
Utoqqaat angerlarsimaffiat imaluunniit paaqqutarineqarluni angerlarsimaffik tassaapput kommunip ulloq unnuarlu paaqqutarinnittarfiutaat, tamaanilu ulluinnarni utoqqaat allat, sulisut aammalu ilaquttat ikinngutillu inoroorsaaqatigiissinnaapput.
Najugaqartutut ulluinnarni sammineqartartunut assigiinngitsunut aamma ilaasinnaavutit, kisimiinnissamillu eqqissisimaarnissamillu pisariaqartitsilissaguit najugaqartut tamarmik immikkut ineqartinneqarlutik.
Utoqqaat angerlarsimaffiannut nuukkuit, pequtivit ilaasa nassarnissaannut periarfissaqarputit. Nammineerlutit pequteqanngikkuit inimik pequtsersukkamik pissarsissaatit, utoqqaallu angerlarsimaffiata siniffik paaqqutarineqarfissaq, siniffiup nerrivia saagullu pisariaqartitsineq malillugu tunniussinnaavai.
Kommunini kisiartaalluni Qeqqata Kommunia utoqqaat angerlarsimaffiat aamma paaqqutarineqarluni angerlarsimaffik kiisalu utoqqarnut inissiat pillugit najoqqutassiorsimavoq uani atuarsinnaasannik (danskisut allassimavoq).
Piumasaqaatit
Utoqqaat angerlarsimaffiat aamma paaqqutarineqarluni angerlarsimaffik tassaapput utoqqaat soraarnerussutisiallit tamarmik aammalu inersimasut siusinaartumik soraarnerussutisiallit namminneq angerlarsimaffimminni naammassineqarsinnaanngitsumik paaqqutarineqarnermik annertunerusumik pisariaqartitsisut najugaqarfigisinnaasaat. Tassa imaappoq:
- Soraarnerussutisiallit najugarisaminni angerlarsimaffimmi ikiortimit tapersersorneqarlutik imminnut isumagisinnaanngitsut
- Soraarnerussutisiallit najugarisaminni imaluunniit najukkaminni inuiaqatigiinni imminnut isumagisinnaanngitsut
- Soraarnerussutisiallit ukioqqortunertik pissutigalugu ima sanngiitsigilersimasut allaat ulluinnaat ingerlasinnaaniassappata ikiorserneqarnissamik pisariaqartitsisut
- Soraarnerussutisiallit puigortunngornermik nappaatillit.
Akiliuteqarneq
Utoqqalinermi soraarnerussutisianik imaluunniit siusinaartumik soraarnerussutisianik pisartagaqaruit aamma utoqqaat angerlarsimaffiannut imaluunniit paaqqutarineqarluni angerlarsimaffimmut nuullutit, qaammammi nuuffiusumi qaammatillu tulliani soraarnerussutisiatit allanngortinnagit pissarsiarissavatit. Tamatuma kingorna soraarnerussutisialittut imaluunniit siusinaartumik soraarnerussutisialittut ataatsimut aningaasat pisartakkavit 20 %-iata nalinga kaasarfimmiussatut pissarsiarisalissavatit.
Utoqqalinermi soraarnerussutisiavit imaluunniit siusinaartumik soraarnerussutisiavit saniatigut akileraarutaasussanik isertitaqartaruit, utoqqaat angerlarsimaffianni aamma paaqqutarineqarluni angerlarsimaffimmi najugaqarnermut tamakkiisuusumik ilaannakortumilluunniit akiliuteqartarnissat piumasarineqarsinnaavoq. Taamaattoq soraarnerussutisiavit saniatigut akileraarutaasussamik isertitavit, akileraareerluni 60 %-iat sinnerlugu akiliuteqartinneqartussaanngilatit.
Tjenestemandiusimaguit tjenestemanditut soraarnerussutisiavit 60 %-iat tikillugu najugaqarnerminnut akiliutigisassavat.
Qinnuteqarneq
Paaqqutarineqarnissamik inissamik qinnuteqarneq kommunimit suliarineqartarpoq. Inissamik qinnuteqarniaruit kommunip angerlarsimaffimmi paarsisuanut, kommunimi sulianik sullissisunnut, napparsimavimmi uninngaguit sulisunut imaluunniit oqilisaanneqartaruit oqilisaanneqartarfimmi sulisumut saaffiginnissaatit. Sulisut taaneqartut ilaat peqatigalugu qinnuteqarnissamut immersuiffissaq immersorsinnaavat. Immersuiffissaq kommunimi pissarsiarisinnaavat.
Nakorsaatitortaruit, nakorsaatit allattorsimaffiat ilanngutissavat.
Ilaqutaasut utoqqaat angerlarsimaffiannut imaluunniit paaqqutarineqarluni angerlarsimaffimmut utoqqaq sinnerlugu qinnuteqarsinnaanngillat. Utoqqaq nammineq qinnuteqassaaq. Utoqqaq nammineerluni isummersinnaanngippat, assersuutigalugu pineqartoq puigortunngorsimappat, taava maleruagassat immikkut ittut atuuttarput. Kommunimi sulianik suliarinnittartoq aperiuk.
Kommuneqarfik Sermersuumi aamma Kommune Kujallermi qinnuteqaat peqarpallu ilanngussat najukkami innuttaasunik sullissivimmut nunaqarfimmiluunniit allaffimmut tunniunneqassaaq.
Qeqqata Kommuniani qinnuteqaat peqarpallu ilanngussat kommunimi utoqqarnut immikkoortortaqarfimmut tunniunneqassaaq.
Nalilersuineq
Qinnuteqaatit kommunip tigoreerpagu, nalilersuinermut ataatsimiititaliami illit angerlarsimaffinni najugaqaannassanersutit imaluunniit utoqqarnut naleqqunnerusumik ilusilersugaq inissiaq najugaqarfigilissanerit nalilersorneqassaaq. Illit timikkut tarnikkullu peqqissutsit aamma inuttut inissisimanerit pingaartumik aalajangiisuussapput. Ikiorsiissutinik allanik pissarsinikkut, assersuutigalugu inissiap allanngortiternissaanut ikiorsiineq, atortut ikiorsiissutit, angerlarsimaffimmi ikiorti imaluunniit ulluunerani paaqqutarineqarnissamik neqeroorut, imminut isumagisinnaanersutit ilaatigut nalilersuinermut ataatsimiititaliamit pingaartinneqassaaq.
Utaqqisut allattorsimaffiat
Utoqqaat ataatsimoorlutik najugarfii, utoqqaat angerlarsimaffii aamma paaqqutarineqarluni angerlarsimaffiit utaqqisunut allattorsimasuuteqartarput. Taamaammat inissamik nalilersuinermut ataatsimiititaliamit innersuunneqarsimagaluarlutit inissamik erngertumik tunineqarnissat naatsorsuutigisinnaanngilat. Inissaqanngippat utaqqisut allattorsimaffiannut allanneqassaatit. Taamaammat utoqqaat angerlarsimaffianni imaluunniit paaqqutarineqarluni angerlarsimaffimmi inissaq pisariaqartitsinerpaamut neqeroorutigineqartarmat utaqqisut allattorsimaffianni inissisimanerit tikkuussisuuginnassaaq.
Ulluinnarni pitsaanerusumik inooqqullutit inissamik utaqqinivit nalaani ikiorsiissutinik allanik neqeroorfigineqassaatit. Assersuutigalugu:
- Eqqiaanissamut aamma inuttut eqqiluisaarnissamut angerlarsimaffimmi ikiorteqarneq
- Nerisassanik pajunneqarneq
- Orluffiusinnaasut eqqumaffigineqassapput
- Ikiorsiissutit allat imaluunniit inissiap allanngortiternera.
Inatsisit
- Utoqqarnik paaqqinniffiit il.il. pillugit Inatsisartut peqqussutaat nr. 11 ulloq 30. oktober 1998-imeersoq
- Angerlarsimaffimmi ikiorteqartitsisarneq pillugu Namminersornerullutik Oqartussat nalunaarutaat nr. 32, 26. juli 1994-imeersoq
- Inuit innarluutillit tapersersorneqarnissaannut Inatsisartut inatsisaat nr. 13, 12. juni 2019-imeersoq