Utoqqalinersiat
Utoqqalinersiat
Utoqqalinersiaqarniarlutit qinnuteqarninniit utoqqalinersiaqarnissamut piumasaqaatit naammassigukkit qaammammi tulliuttumi aallaqqaataaniit utoqqalinersiaqalersinnaavutit.
Utoqqalinersiaqassaguit:
- 67-inik ukioqalereersimasariaqarputit
- danskit naalagaaffianni innuttaasutut nalunaarsorsimasariaqarputit imaluunniit qinnuteqarneq sioqqullugu sivikinnerpaamik ukiuni pingasuni Kalaallit Nunaanni aalajangersimasumik najugaqarsimasariaqarlutit
- 15-inik ukioqalernermit utoqqalinermilu ukiorisavit akornanni Naalagaaffeqatigiit iluanni – Danmarkimi, Kalaallit Nunaanni imaluunniit Savaliummiuni -sivikinnerpaamik ukiuni pingasuni najugaqarsimassaatit.
Utoqqalinersiat pillugit uani paasisaqarnerusinnaavutit.
Siusissukkut utoqqalinersiaqalissaguit:
- 65-inik ukioqalereersimassaatit 67-inillu ukioqalersimanak.
- sulisinnaajunnaarsimassaatit, sivikinnerpaamillu ukiuni 35-ni atasuinnarmik sulisimassallutit
- ukiuni 35-ni sulisimanerit timikkut tarnikkullu oqimaatsumik sulisimanermut attuumassuteqassaaq
- suli suliffeqassaatit.
Siusissukkut utoqqalinersiat pillugit uani pasisaqarnerusinnaavutit.
Qinnuteqaat
Utoqqalinersiaqalerniarlutit kommunerisannut qinnuteqassaatit. Immersugassat marluk immersussavatit kingornalu kommunerisat ataani toorlugu pissarsiarisinnaasannik imaluunniit kommunerisanni sullissivimmut saaffiginnillutit.
Utoqqalinersiat amerlassusaat
Akigititat ukiut tamaasa 1. januaari iluarsineqartarput.
2024-mi akigititat
Toqqammaviusumik aningaasartat utoqqalinersianullu tapit:
- Toqqammaviusumik aningaasartat tamanut: 78.507 kroner
- Utoqqalinersianut tapeq, kisermaaq: 85.642 kroner
- Utoqqalinersianut tapeq, aappaqartoq: 47.604 kroner
Saniatigut isertitaqarneq
Utoqqalinersiavit saniatigut sulinermit isertitaqarsinnaavutit. Utoqqalinersialli ikilisarneqalersinnagit tamakkiisumilluunniit peerneqartinnagit, ukiumut isertitarisinnaasavit killissarititaat aalajangersarneqartarput.
Isertitanut killigititat annikillisitsinerlu – toqqammaviusumik aningaasartat
Toqqammaviusumik aningaasartanik appartitsinermut isertitanut killigititaq: 405.059 kroner
Isertitanut killigititaq, toqqammaviusumik aningaasartanik tamakkiisumik
pisinnaatitaanermut: 601.327 kroner
Isertitanut killigititat annikillisitsinerlu – Tapeq – kisarmaaq
Tapeq ilanngaanneqannginnissaanut iserititanut killigititaq: 160.368 kroner.
Isertitanut killigititaq, tapinut tamakkiisumik pisinnaatitaanermut: 405.058 kroner.
Isertitanut killigititat annikillisitsinerlu – Tapit – aappaqartoq
Tapeq ilanngaanneqannginnissaanut isertitanut killigititaq: 188.124 kroner.
Isertitanut killigititaq, tapinut tamakkiisumik pisinnaatitaanermut: 404.504 kroner.
Danmarkimi utoqqalinersiat
Nunatsinni utoqqalinersiaqartuullutit Danmarkimut nuukkuit, utoqqalinersiatit attatiinnarsinnaanngilatit. Allatut oqaatigalugu, Danmarkimut nuukkuit qaammatip naanerani utoqqalinersiatit taamaatinneqassapput.
Taamaattorli Danmarkimi folkepensioneqarnissannik qinnuteqarsinnaavutit. Danmarkimut nuunniaruit piumasaqaatit eqquutsissimagukkit taakku qinnuteqaatigissavatit. Aatsaat Danmarkimi najugaqaruit folkepensioneqarnissamut qinnuteqarsinnaavutit. Taamaammat eqqaamassavat nuunnerit oqartussanut nalunaarutigissagakku.
Danmarkimi folkepensioninik pisartagaqarniaraanni piumasaqaataavoq:
- Danskit naalagaaffianni innuttaassuseqarnissat
- Danmarkimi aalajangersimasumik najugaqarnissat
- 15-inik ukioqalernermit utoqqalinersiaqalertarnerlu tikillugu ukioqarnermi Danmarkimi, Savalimmiuni Kalaallit Nunaannilu sivikinnerpaamik ukiuni pingasuni aalajangersimasumik najugaqarsimanissat.
Folkepensioninik pisartagaqalersinnaaninnut maleruagassat assigiinngitsut pigineqarput. Assersuutigalugu 65-inik imaluunniit 67-inik ukioqarlutit folkepensioninik pisartagaqalersinnaassaguit, ukioq suna inunngorsimanerit apeqqutaavoq. Taamaammat danskit inatsisaanni piumasaqaatit eqquutsinnerlugit eqqumaffigissavat.
Folkepension pillugu uani paasisaqarnerusinnaavutit (danskisut allassimapput).
Inatsisit
Utoqqalinersiaqarneq pillugu Inatsisartut inatsisaata allanngortinnissaa pillugu Inatsisartut inatsisaat nr. 35, 28. november 2019-imeersoq (Utoqqalinersianik appaasoqartinnagu aningaasanik innuttaasup akissarsiarisinnaasaanik qaffaaneq)
Utoqqalinersiaqarneq pillugu Inatsisartut inatsisaat nr. 6, 2. juni 2017-imeersup allanngortinnissaa pillugu Inatsisartut inatsisaat (Inatsisip kalaallisut oqaasertaani § 17, imm. 6-mut aaqqiissut)
Utoqqalinersiaqarneq pillugu Inatsisartut inatsisaata nr. 20, 23. november 2015-meersup allanngortinneqarnera pillugu Inatsisartut inatsisaat nr. 24, 7. december 2015-meersoq (§ 5, imm. 2 malillugu isertitat toqqammavigineqartut naatsorneranni aamma utoqqalinersianut tapit nalimmassarneqarneranni utoqqalinersiarineqartut aammalu Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat naapertorlugu utoqqalinersiarineqartut ilanngunneqartassannginnissaat pillugu.)
Utoqqalinersiaqarneq pillugu Inatsisartut inatsisaat nr. 20, 23. november 2015-meersoq
Utoqqalinersiaqarneq pillugu Inatsisartut inatsisaat pillugu Namminersorlutik Oqartussat nalunaarutaat nr. 3, 7. februar 2022-mersooq