Napparsimasut maalaaruteqarsinnaanerat

Piumasaqaatit
Maalaarutit suliarisinnaassagutsigu suliami paasissutissat pillugit saaffiginnissutit, maalaarutigineqartut uppernarsarneqarnerat ilaalu ilanngullugit, Nunatsinni Nakorsaaneqarfimmi Peqqinnissaqarfiullu qullersaqarfiani sulianik ingerlatsisunit, maalaarutivit suliarineqarnerani ilinnut nassiunneqartut akissuteqarfigissavatit. Saaffiginnissutit akissuteqarfiginngikkukkit suliaq naammattumik tunngaveqarani ingerlanneqassaaq. Taanna maalaarutivit akuerineqanngitsoorsinnaanerata annertunerulerneranik suliamillu ingerlatsinerup sivitsorneranik kinguneqarsinnaavoq.

Imaaliussaatit

Nakorsartinneq pillugu maalaarutit makku arlaat aqqutigalugu nassiussinnaavat:

• Sullissivik.gl aqqutigalugu ”Nakorsartinnermut maalaarut” MitID-it atorlugu iseriarlutit, immersugassaq immersoriarlugu nassiullugu, imaluunniit
• Maalaaruteqarnermi immersugassaq immersoreerukku anillatseriarlugu e -mailikkut nassiullugu uunga: nun@nanoq.gl, imaluunniit allakkatigut nassiullugu uunga: Nunatsinni Nakorsaaneqarfik, Postboks 120, 3900 Nuuk

Maalaarutigisannik nassiussinissamik ukunannga ikiorneqarsinnaavutit:

• Kommunimi najukkanni innuttaasunut sullissivik (teknikkikkut ikiorsiineq),
• Nunatsinni Nakorsaaneqarfik mailikkut: nun@nanoq.gl imaluunniit oqarasuaatikkut: 34 51 92 attavigalugu, imaluunniit
• Peqqinnissaqarfimmi siunnersorti, e-mail siunnersorti@peqqik.gl imaluunniit oqarasuaat 34 40 50.

Malugiuk:
Inuk alla sinnerlugu maalaarummik nassiussissaguit akuersissummik pissarsisimassaatit.
Akuersissummik tunniussisussap immersugassaq tamatumunnga atugassiaq immersussavaa atsioriarlugulu e-mailikkullu nun@nanoq.gl-imut nassiullugu.

Piffissaliussat

Maalaarutivit sapinngisamik sukumiinerpaamik kinguneqarluartumillu suliarineqarnissaa anguniarlugu, pisimasup kingorna sapinngisamik piaarnerpaamik maalaaruteqarnissat pingaaruteqarpoq.
Maalaaruteqarnissavit tungaanut piffissaq sivisuallaaq ingerlappat peqqinnissakkut sullissisut suliami annikitsualuit eqqaamajuminaatsissinnaavaat allamiluunniit suliffeqalersimasinnaallutik. Tamakku suliamik ingerlatsinissaq ajornakusuulersissinnaavaat.

Peqqinnissaqarfimmi nakorsarneqarneq maalaarutiginiarukku kingusinnerpaamik piffissap maalaarutiginiakkavit paasineraniit ukiut marluk qaangiutsinnagit tamanna pissaaq. Nakorsartinneq pillugu maalaaruteqarneq nakorsartereernermi kingusinnerpaamik ukiut tallimat qaangiutsinnagit pissaaq.

Taarsiivigineqarnissamik noqqaassuteqarneq

Peqqinnissaqarfimmi pisortat ingerlataanni peqqinnissakkut sullissisumit nakorsartinneq pillugu maalaarutinnut atatillugu taarsiiffigitinnissaq qinnutigisinnaavat. Ajoquserneqarnikkut anniaatinut aningaasatigulluunniit annaasanut taarsiiffigitissinnaavutit.

Makku arlaannut taarsiiffigitinnissaq qinnutigisinnaavat:

• Sulisinnaannginnermi annaasaqaatit
• Ajoquserneqarnikkut anniaatit
• Ataavartumik ajoqutigilikkat
• Inuussutissarsiorsinnaanermik annaasaqarneq
• Pilersuisorisamik annaasaqarneq
• Kukkusumik nakorsarneqarnerup kingunerisaanik peqqissutsimut tunngatillugu aningaasartuutit allatigullu aningaasanik annaasaqarneq.

Peqqinnissaqarfimmi sullinneqarneq pillugu maalaarutit nassiukkakku taarsiiffigitinnissamik kissaateqarnerit nalunaarutigisimagukku, taanna Nunatsinni Nakorsaaneqarfiup Peqqissutsimut Naalakkersuisoqarfimmut ingerlateqqissavaa.

Malugiuk:
Peqqinnissaqarfimmi nakorsartinneq pillugu maalaarummik nassitsininnut ilanngullugu taarsiiffigitinnissamut qinnuteqarsinnaavutit. Maalaarutit inerniliisumik aalajangiivigineqareerpat aatsaat taarsiiffigitinnissamut noqqaassutit suliarineqassaaq.

Peqqinnissaqarfimmi sullineqarneq pillugu maalaarutit akuerineqarpat aatsaat taarsiiffigitissinnaavutit.

Taarsiiffigitinnissamut noqqaassuteqarsinnaanngilatit

• Ajoqusernermi annaasat allatigut matussuserneqarsimappata, assersuutigalugu sillimmasiisarfik aqqutigalugu taarsiiffigitinnikkut sulisinnaannginnermi annaasaqaatit matussuserneqareersimappata
• Nappaammut nakorsartinnerit pissutigalugu ajoqusersimaguit annaasaqarsimaguillu
• Nappaatinnut nakorsarneqartumut patsiseqartunik ajoqusernernut annaasannullu
  Peqqinnissaqarfimmi pisortat ingerlataanni kiffartuussineq pillugu maalaarummut atatillugu
• Peqqinnissakkut sullissisuni Peqqinnissaqarfiup pisortanit ingerlanneqartup avataaniittuni, imaappoq kigutilerisuni namminersortuni, timimik sungiusaasuni assigisaannilu nakorsartinnerup kingunerisaanik ataavartumik ajoquteqalernermi imaluunniit aningaasatigut annaasaqarnermi.

Malugiuk:
Peqqinnissaqarfimmi sullissisunit Peqqinnissaqarfiup pisortanit ingerlanneqartup avataaniittunit, imaappoq kigutilerisunit namminersortunit, timimik sungiusaasunit assigisaanniillu nakorsartereernermi taarsiiffigitinnissannut noqqaaniaruit noqqaassutit katsorsaasumut toqqaannartumik nassiutissavat.

Aalajangiinernik maalaaruteqarneq

Peqqinnissaqarfimmi nakorsarneqarneq pillugu maalaaruteqarneq
Peqqinnissakkut ilinniagalimmit nakorsarneqarneq pillugu maalaarutivit aalajangiivigineqarnera allaffissornikkut pisortaqarfimmut allamut maalaarutigisinnaanngilat.

Kiffartuussineq pillugu maalaarutit
Peqqinnissaqarfimmi pisortanit ingerlanneqartumi kiffartuussineq pillugu maalaarutinnut oqaaseqaat naammaginngikkukku, maalaarutit Peqqisutsimut Naalakkersuisoqarfimmut saqqummiussinnaavat.

Inatsisit

• Peqqinnissaqarfiup aqunneqarnera, aaqqissuussaanera kiisalu peqqinnissamut tunngasutigut sullissisut aamma tarnip pissusaanik ilisimasallit pillugit Inatsisartut inatsisaat nr. 27, 18. november 2010-meersoq
• Nunatsinni Nakorsaaneqarfiup sulinera pillugu Namminersorlutik Oqartussat nalunaarutaat nr. 7 15. juni 2017-imeersoq
• Napparsimasut Maalaarutaannik Aalajangiisartunut maalaaruteqartarneq pillugu Namminersorlutik Oqartussat nalunaarutaat nr. 14, 24. september 2012-imeersoq