Angerlarsimaffimmi ikiorteqarneq
Angerlarsimaffimmi ikiorteqarneq
Angerlarsimaffimmi ikiorteqarneq nammineq inuttut angerlarsimaffigisami pisariaqartitat najoqqutaralugit qanoq ukioqarnerit apeqqutaatinnagu ikiorteqarneruvoq paaqqutarinninnerullunilu. Assersuutigalugu uffarnissamut aamma eqqiluisaarnissamut kiisalu allatigut eqqiaanermut, pisiniarnermut atisanillu errorsinermut ikiuinerusinnaavoq. Angerlarsimaffimmi ikiorteqarnermisaaq nerisaqarnikkut neqerooruteqarfiusarpoq, tamatumani nerisassat kissartut kommunimi utoqqaat illuannit angerlarsimaffinnut aggiunneqarsinnaasut pisiarisinnaavatit.
Angerlarsimaffimmi ikiorteqarnermi siunertaavoq:
- Illit sapinngisamik sivisunerpaamik nammineq sungiusimasat atugaralugit angerlarsimaffinniissinnaanissat
- Nammineq angerlarsimaffinni toqqissisimanissavit qulakkeernissaa
- Najukkanni avatangiiseqarsinnaanissat najukkannilu attavigisatit aamma ilaquttatit ikinngutitillu attavigiuarsinnaallugit.
Piumasaqaatit
Angerlarsimaffimmi ikiorteqartitsinissamut tassungalu attuumassuteqarsinnaasumik saaffiginnissuteqarnermi Kommunerisavit pisussaaffigaa siunnersuineq ilitsersuinerlu ilinnut / ilissinnut ingerlatissallugu.
Innuttaasut sukkulluunniit utoqqalinersiaqarsinnaatitaanermut ukiut killissarititaasut nallerneqarsimatillugit, pisinnaatitaaffigaat aningaasartuutitaaqanngitsumik angerlarsimaffimmi ikiorteqartinneqarsinnaaneq, nalunaallisippagu pisaqariartoq utoqqalinersialik nammineq angerlarsimaffimmiiniigiinnarsinnaanera.
Utoqqalinersialittut piffiit ilaanni imaluunnit ataavartumik piginnaasat appariaateqarsinnaasarput, ulluinnarni nammineq angerlarsimaffigisami nalinginnaasut suliarinissaat naammassinninnissamut killeqalerlutik, taamaalilluni pisariaqalersinnaalluni angerlarsimaffimmi ikorteqartinneqaqqaarnikkut ulluinnarni suliassaasut naammassinniarnissaanut.
Ataavartumik angerlarsimaffimmi ikiorteqartitsineq aamma pisinnaavoq utoqqarnut innarluutilinnut, imaluunniit inuttut peqqissutsimit peqquteqartumik annertunerusumik ikiorserneqartariaqarnermi, soorlu assersuutigalugu nammineq angerlarsimaffigisami paaqqutarineqartariaqarneq, sumiiffimmi utoqqaat illuanut inissamik neqeroorfigineqarnissamut utaqqinermi.
Pisariaqartitsinermik naliliineq
Utoqqaat tamarmik immikkuullarissuseqartuupput, aammalu pisariaqartitaat assigiinngitsuullutik, taamaammat illit / ilissi pisariaqartitasi inissimaffissi tunngavigalugu ikiorteqartitsinissaq naleqqussarneqarsimassaaq.
Angerlarsimaffimmi ikiorteqartitsinissamut qinnuteqartoqarsimatillugu, pinngitsoorani angerlarsimaffigisamut susassaqartumiit naliliaartortumik pulaartoqaqqaarsimanissaa pingaaruteqarpoq, suliamut ataatsimut tamaat isigalugu sutigut angerlarsimaffimmi ikiorteqartinneqarnissaamut illit / ilissi pisariaqartitsinersusi.
Ikiorteqarnissamut nalilersuutaasut tunngavigalugit nalilerneqassaaq angerlarsimaffimmi ikiorti sutigut ikiuuttassanersoq, taamaammat angerlarsimaffimmi ikiorteqartitsinissamut Kommunerisamiit akuersissummik tunniussaqartoqarsimatillugu, inassutigineqassaaq allakkatigut suut angerlarsimaffimmi ikiortip suliarisassaasa allattorneqarsimanissaannik piumasaqaateqartarnissaq.
Pisariaqartitat allat
Allatut aamma pisoqartillugu kommunimit ikiorserneqartarsinnaavutit, assersuutigalugu:
- Aputaajaanermut
- Imertaanneqarnermut, najugarisami imermut attavilerneqarsimanngitsumi najugaqaruit
- Nammineq pisinnaajunaarsimagaanni illup kiassarnissaanut solarimut assartuusissunneqarneq
Ulluinnarni inuuniarnikkut iluaqusersuutit pisariaqartinneqarsinnaasut allat, assersuutitut maakkusinnaapput, kitsiviit immikkut ilusilersukkat, nerisassiornermi nerinermiluunniit sakkut immikkut ilusilersukkat, ajaappissat, qamutit kaasuartakkat – pisutsilluni qamutit kaasuartakkat, immikkut alersinut atisinianermi iluaqusesuut il.il.
Pisariaqartitanik allannguineq
Pisariaqartitsinerit imaluunniit pisariaqartitsinersi nikerarsinnaavoq, taakkualu tunngavigalugit naleqquttumik ikiorserneqarnissat imaluunniit ikiorserneqartarnersi nalilersorneqartarnissa pitsaasuuvoq, taamaammat inassutigineqassaaq akuersissummi allaqqasoqarnissaa nalilersuinissaq tulleq qaqugu ingerlanniarneqareqarniarneqarneranik allaqqasoqarnissaa.
Sumut paasiniasinnaavunga
Angerlarsimaffimmi ikiorteqartitsisarneq pillugu annertunerusumik paasisaqarsukkaanni Kommunerisaq saaffigineqassaaq.
Inatsisit tunnngavigineqartut
Inatsisartut inatsisaat nr. 20. 23.november 2015 utoqqalinersiat tunniunneqartartut pillugit, § 18
Namminersornerullutik oqartussat nalunaarutaat nr.32 26.juli 1994-meersoq, angerlarsimaffimi ikiorteqartitsisarneq pillugu
Angerlarsimaffimmi ikiorteqartitsisarnermut ilitsersuut.
Immikkut malugeqquneqarpoq Nalunaarut ilitsersuullu nutaanngitsuummata ullutsinnullu naleqqussagaagatik.
Inatsisit