Ineqarnermut tapit
Ineqarnermut tapit
Ineqarnermut tapiissutit inoqutigiinnut inissiami attartortittakkami najugaqartunut tunniunneqartarput. Ineqarnermut tapiissutit inoqutigiit maannakkut isertitaat kiisalu meeqqat inissiami aalajangersimasumik najugaqartut amerlassusaat tunngavigalugit tunniunneqartarput.
Aatsaat ineqarnermut tapiissutinik pisinnaavutit:
- Attartukkami najugaqaruit
- Inimik attartornissamut allaganngorlugu isumaqatigiissummik peqaruit
- Akigititani aningaasaqarnikkut atugassarititaasut pillugit piumasaqaataasut naammassineqarsimappata.
Akigititat
Ineqarnermut tapiissutit init qassiuneri (ini ineeqqallu) aamma inuit inoqutigiinni najugaqartut kiisalu init katersuuttarfiit aallaavigalugit naatsorsorneqartarput. Tassa imaappoq ineqarnermut tapiissutinik pisinnaatitaavutit imaattoqartillugu:
- Inoqutigiinni kisimiittuuguit, inillu marluuppata
- Inoqutigiinni inuit marluuppata, inillu pingasuuppata
- Inoqutigiinni inuit pingasuuppata, inillu sisamaappata
- Inoqutigiinni inuit sisamaappata, inillu tallimaappata
Annikillisitsiartuaarneq: Inoqutigiit maannakkut isertitaasa tamarmiusut aningaasartat aalajangersimasut sinnersimappagit, tapiissutit ineqarnermut tapiissutini pissarsiarisinnaasatit, appassapput. 2024-mi januaarip 1-aniit uku atuupput:
- Ilaqutariit meerartaqanngitsut 67.686 koruunit sinnerlugit maannakkut isertitaqarpata annikillisitsiartuaarneq aallartissaaq. 202.687 koruuninik maannakkut isertitaqartartunut ineqarnermut tapiissutisisarneq atorunnaarsinneqassaaq
- Ilaqutariit meerartallit 28.203 koruunit sinnerlugit maannakkut isertitaqarpata, annikillisitsiartuaarneq aallartissaaq. 419.204 koruuninik maannakkut isertitaqartunut ineqarnermut tapiissutisisarneq atorunnaarsinneqassaaq
Utoqqalinersialimmut imaluunniit siusinaarluni soraarnerussutisialimmut maannakkut isertitani 4.100 kr. ilanngaatigineqassapput:
- Nalinginnaasumik annerpaamik tunniunneqarsinnaasut: ukiumut 60.000 kr. / qaammammut 5.000
- Ineeqqamut ataatsimut annerpaamik tunniunneqarsinnaasut: ukiumut 18.000 kr. / qaammammut 1.500
- Minnerpaamik tunniunneqarsinnaasut: ukiumut 1.200 kr. / qaammammut 100
Maannakkorpiaq aningaasarsiat pillugit uani paasisaqarnerugit
Ineqarnermut tapiissutinik qinnuteqarniaruit, immersugassaq immersussavat. Attartornermut isumaqatigiissut immersukkannut kakkiutissavat. Attartornermut isumaqatigiissut pissarsiarigukku ingerlaannaq qinnuteqarsinnaavutit.
MitID-mik atuisuunngitsunut
MitID-mik atuisuunngikkuit immersugassaq immersukkat ilanngussat pisariaqartut ilanngullugit najukkanni innuttaasunut sullissivimmut imaluunniit nunaqarfimmi allaffimmut tunniutissavat. Tassani qinnuteqarnermut immersugassap immersornissaanut aamma ikiorneqarsinnaavutit. Immersugassat nassaarisinnaavatit una toorlugu kommunerisavillu aqqa toorlugu. Ilitsersuutitai maliinnassavatit
Malugiuk
Ukiut tamaasa qinnuteqarnissat pisariaqanngilaq. Ineqarnermut tapiissutit ukiut tamaasa ingerlaannartumik naatsorsorneqartarput, qanorlu amerlatigisunik pissarsinissat pillugu kommunimit allagarsissallutit. Allakkat tigoreernerisa kingorna aningaasartai iluarsineqartussaappata, najukkanni innuttaasunut sullissivimmut imaluunniit nunaqarfimmi allaffimmut saaffiginnissaatit.
Inissiamut allamut nuukkuit, nutaamik qinnuteqaateqassaatit.
Ineqarnermut tapiissutinik pisussaatitaanak ilisimareeraluarlugu pissarsisimaguit, akiligassinneqarsinnaavutit.
Inatsisit
- Ineqarnermut tapiissutisinissamut appariartuaartitsinissamut killiliussat, aningaasanut killiliussat, akiliutip ilaata agguaqatigiissinnera nammineq akiligassaq kiisalu ineqarnermut tapiissutit aningaasartaasa minnerpaaffissaat annerpaaffissaallu pillugit Namminersorlutik Oqartussat nalunaarutaat nr. 20, 24. novembari 2017-imeersoq
- Inissiani attartortittakkani ineqarnermut tapiissutit pillugit Inatsisartut inatsisaat nr. 23 7. december 2015-imeersoq
- Procenti aaqqiissutissaq aamma maannakkorpiaq aningaasarsiat pillugit Inatsisartut inatsisaat nr. 9, 1. juni 2017-imeersoq