Isigisat ajorsiartornerat
Isigisat ajorsiartornerat
Ukioqqortusiartornerit ilutigalugu isigisavit allanngoriartornerat pissusissamisoorpoq. Ippigusuutillu iliuuseqarfigisinnaavatit. Isigisatigut ajornartorsiuteqarunnaartarneq assigalugu isigisatigut allannguuteqarneq ernumanaateqanngilaq ajornanngitsunnguamillu iliuuseqarfigineqarsinnaalluni.
Ikittuaraannaalli isigisatigut ajornartorsiuteqanngitsoortarput. Utoqqalininni isitigut ajornartorsiutigilersinnaasatit nalinginnaanerusut tassaapput qanittuinnarmut imaluunniit ungasittuinnarmut isigilluarsinnaaneq aamma inunnguutsimik isit innarluuteqarnerat.
Isigisavit allanngoriartortarnerat
Isigisat toqqakkanik isigisanut aamma avatangiisinut isigisanut immikkoortinneqarsinnaapput. Toqqakkamik isigisat assersuutigalugit tassaasinnaapput nakkussinikkut mikisualunnik, qalipaatinik aamma ilutsinik isigisat.
Avatangiisinik sussusersiniaraangatta avatangiisinut isigisaq atortarparput. Taamaasiortarputit soorlu aqqusineq ikaarnialeraangakku. Avatangiisitit toqqarlugit isigineq ajorpatit, pisunninnili avatangiisinut isigisatit atorlugit sumiissusersiortarputit.
Utoqqaliartorninni toqqakkanik isigisatit allanngoriartortut malugissavat. Isiginiarnerit ajornarsisinnaavoq tappissuserlu ajortilluni aammalu mikisunik isiginiarnermi atuarniarnermiluunniit qulleqarnissaq pisariaqalersarluni.
Utoqqartut isigisaqalerneq imaluunniit utoqqaliartornermi isigisaqalerneq
Atuarniakkatit ungasilleqqaarlugit aatsaat atuarsinnaasarpit? Taava utoqqartut isigisaqalersimassaatit imaluunniit utoqqaliartornermi isigisaqalersimallutit. Tamanna nalinginnaasuulluinnarpoq, tassami ukioqqortusiartorneq ilutigalugu isit igalaasartaat tasisuarunnaarlutik qerattariartortarput, taamalu ungasissutsinit assigiinngitsunit isiginiartilluni tappissuseq sanngiilliartortarpoq. Taamaattumik-una atuarniakkanni naqinnernik ilisarsiniarsaralutit atuarniakkatit ungasillisaritit.
Utoqqalinermi isigisaqalerneq 40-t missaannik ukioqalernermit atugaalersarpoq, taamalu ungasissumut tappikkaluarlutit naqinnernik mikisunik atuarniarit ajornarnerulertarpoq. Utoqqalinermi isigisaqaleraangavit isitit ilungersuatilersarpatit immaqalu niaqorluutigilersarlugu. Qujanartumillu isarussat atuffatit, qarasaasiarsornermi isarussat imaluunniit linsit atorlugit utoqqalinermi isigisaqalersimasunut iluaqutaasinnaapput.
Utoqqalinermi isigisaqalerneq pillugu qallunaatut uani annertunerusumik atuagaqarsinnaavutit: www.ojenforeningen.dk
Isip igalaasartaa ersernerlutsitsisoq
Isip igalaasartaata akimut ersarissusaa ajorsiartuleraangat nappaat isip igalaasartaa ersernerlutsitsisoq atugaalersarpoq. Navianaateqanngikkaluarpoq ippingiatortitsisinnaallunili. Eqisalunneqalernerit qeeqalernerillu assigalugit utoqqaliartornermut ilisarnaataavoq.
Nappaat isip igalaasartaa ersernerlutsitsisoq katsorsarneqanngikkaangami isit tappippiarunnaartarput. Taamaammat nappaat isip igalaasartaa ersernerlutsitsisoq malussarfigigukku nakorsiartariaqarputit. Tappippiarunnaarnerup saniatigut isigisat ersernerlussinerat, tappiutip ammarngisa qasertinnerat imaluunniit seqinermit unnuamiluunniit biilertilluni inngiasoruloortarneq (pingaartumik siallersumi) kingunerisinnaavaat.
Nappaat isip igalaasartaa ersernerlutsitsisoq atugaaleraangat isit igalaasartaat peerlugit igalaasartanik plastikkiusunik taarserlugit katsorsarneqarsinnaapput.
Nappaat qanorluunniit ukioqaleraluaraanni atugaalersinnaasarpoq, 65-illi sinnerlugit ukioqalersimasuni atugaanerulersarpoq.
Nappaat isip igalaasartaa ersernerlutsitsisoq pillugu qallunaatut uani annertunerusumik atuagaqarsinnaavutit:www.ojenforeningen.dk
Isimi naqitsineq qaffasippallaartoq
Nappaat isimi naqitsineq qaffasippallaartoq nappaammit isip igalaasartaa ersernerlutsitsisumit atugaannginneruvoq 60-illu sinnerlugit ukioqalernermi nappaatigineqakkajulersarpoq.
Isimi naqitsineq qaffasippallaartoq nappaatigileraanni isimi naqitsineqarpallaalernermi isip nappaatai assigiinngitsut nappaatigineqalersarput. Naqitsineqarpallaalernermi isip sianiutaa sunnerneqartarpoq, katsorsarneqanngikkaangallu tappingissutaasinnaasarpoq.
Isimi naqitsineq qaffasippallaartoq nappaatigileraanni katsorsarneqavissinnaanngilaq, siusinaartumilli katsorsartikkaanni nappaatip ajorsiartornera unitsinneqarsinnaasarpoq – amerlanerpaatigullu tappinginngitsoortoqarsinnaasarpoq.
Isimi naqitsineq qaffasippallaartoq amerlanertigut malunniuteqartanngimmat nappaatigineqariartuaartarpoq. Nappaallu aatsaat ingatsereersimagaangat malunniuteqalersarpoq, amerlanertigut isip illuata tappigunnaariartorneragut. Aamma tummeqqatigoorneq nangiarilersinnaavat imaluunniit natermut nakkaasavit nassaariniarnerat ilungersunarsilluni.
Ilaquttanni isimigut naqitsinermik qaffasippallaartumik nappaateqartoqarpat taamatut nappaateqalernissat ilimanarneruvoq. Taamaammat 40-nik ukioqalerninniit misissortittalertariaqarputit.
Isimi naqitsineq qaffasippallaartoq pillugu uani qallunaatut paasisaqarnerusinnaavutit: www.ojenforeningen.dk
Isimi utoqqalinermi simerneqalerneq
AMD tassaavoq utoqqalinermi isip ameraasaani ilorlermi simerneqalerneq. AMD naalisagaavoq isumaqarlunilu Aldersrelateret Macula Degeneration, tappissuserlu isigiarsunnermiit tappissutsip ajorseriangaatsiarneranut sunnerneqartarpoq. Nappaammi qanimut atuarniarnermi isigisat ajorsiartuaarnerannik kinguneqartarpoq.
AMD marlunnut immikkoortinneqarsinnaavoq; AMD paqqersoq aamma AMD seerisulik. AMD paqqersoq ilinni siusissukkut malunniuteqarnaviarunanngilaq, isivillu illua qamikkukku isit isigisinnaasoq atorlugu atuarniarnerit ilungersunarissavat. Kingusinnerusukkut aqqusinermi inuit ilisariuminaallisinnaapput, tassa kiinnat isiginiakkat isip ameraasaani ilorlermi simerneqalersimasup nalaaniittarmata.
AMD seerisulik nappaatigigaanni allannguutit tassanngaannartumik, soorlu ilaatigut sapaatip akunnialuit qaammatilluunniit ikittuinnaat ingerlaneranni isigiarsorujussualernermik kinguneqarsinnaavoq.
Taamaammat isigisatit misilittakulassavatit, aamma isitit ataasiakkaarlugit misilittartassavatit.
AMD aamma katsorsartinnissaq pillugit qallunaatut uani atuarsinnaavatit: www.ojenforeningen.dk
Isigisatit angerlarsimaffinni misilittakkit
Fjernsynertillutit isigisatit misilittarsinnaavatit. Fjernsynerninni isarussatit linsitilluunniit atuinnarlugit imaaliorit:
- Assannik isit asseruk
- Assavit illuanik isivit illua asseruk
- Isitit illuttut tappilluarpat – imaluunniit assigiinngissuseqarpat?
Isitit illugiisillugit tappilluanngippata misissortinnissaat pisariaqalersimassaaq.
Isivit tappissusaat Danmarkimi isit pillugit peqatigiiffiup nittartagaani akeqanngitsumik misilittarsinnaavatit uani: www.ojenforeningen.dk
Isigiarsukkuit ikiortissarsiorit
Isigisatit ajoquteqalersimappata misissortinnissat pingaaruteqarpoq. Isigisatit arriitsumik ajorsiartorpata isarussat atorlugit tappissisinnaanersutit isarusserisup misissuivigeqqaarsinnaavaa.
Isaruartaarnissamut linsitaarnissamullu tapiiffigitinneq
Isarussat isitaannik linsinilluunniit pisinissamut ilaatigut tapiiffigineqarsinnaavutit. Suliaritissimaguit imaluunniit isitigut nappaateqarlutit katsorsartissimaguit isaruartaarnissannut, linsitaarnissannut imaluunniit ikiorsiissutit arlaannik pisaarnissannut nakorsap innersuussutigisinnaavaa.
Nappaatit taakku peqqinnissaqarfimmi sullissinerit atuisullu akiliuteqartarnerat pillugu nalunaarummi § 14-imi nassuiaatigineqarput (linki ataaniittoq takuuk).
Isarussat, linsit ikiorsiissutilluunniit allat sakkortussusaat – 7-imit sakkortuneruppata imalluunniit + 7-imit sakkortuneruppata aamma tapiiffigineqartarput.
Isarussat isitaat linsillu nalinginnaasumik pitsaassusillit tapiiffigineqartarput, aamma siullermeertumik pisaarnermi taamaallaat tapiiffigitittoqarsinnaavoq, imaluunniit sakkortussusaat 0,5-imik allannguuteqarsimappata.
Inatsit