Tarnikkut peqqissuseq
Innuttaasunik 2018-imi misissuisitsinermi apeqqutinik aqqanilinnik akisassartalimmi apeqqarissaarnermi tarnikkut ippigusuutit (ilungersuaneq, nanertisimaneq), imminornissamik eqqarsaateqarneq kiisalu nappaatit allat peqataasut tarnikkut eqqortianerat pillugu nalilersuinernik tunngavillit qanoq atugaatiginerat paasiniarlugu tarnikkut peqqiilliorneq misissuivigineqarpoq. Takusassiami ataaniittumi takuneqarsinnaavoq, arnat angutininngarnit ilungersuanerullutillu nanertisimanerusut, tarnikkut eqqortianerusut aammalu imminornissamut eqqarsaateqarnerusartut. Angutini arnanilu ippigusuutit, soorlu ilungersuaneq, nanertisimaneq tarnikkullu eqqortianeq utoqqaliartornermi annikilliartulaartarput imaluunnit allannguuteqartaratik.
Paasissutissanik pissarsiffik: Ældre menneskers liv og helbred i Grønland, Statens Institut for Folkesundhed
Timikkut nappaateqarneq tarnikkut ersiuteqalernermik kinguneqarsinnaavoq
Utoqqarpaaluit assigiinngitsunik nappaateqartarput. Timikkut nappaateqarneq tarnikkullu ersiuteqarnerit imminnut attuumassuteqakkajupput.
Utoqqaat tarnikkut nappaataasa ersiutaat allanit allaanerusinnaanerat eqqumaffigissallugu aamma pingaaruteqarpoq, amerlasuutigullu allatut katsorsaanissaq pisariaqartarpoq.
Utoqqarnik tarnikkut katsorsaaneq
Innuttaasut utoqqaat tarnikkut nappaateqartutut ersiutillit sulisunit tarnikkut katsorsaanermik aamma nappaatinik allanik utoqqarni atugaasartunik ilisimasalinnit misissorneqarlutillu katsorsarneqarnissaat pingaarutilerujussuuvoq.
Paasissutissanik pissarsiffik: psykiatri.rn.dk
Utoqqarni isummakkut nanertisimaneq
Isummakkut nanertisimasarneq utoqqaliartornermi nalinginnaasuunngilaq. Utoqqarpassuaqarunarpoq isummamikkut nanertisimasartunik misissortinnikkulli suussusianik paasisaqarsimanngitsunik. Utoqqaat isummamikkut nanertisimasut katsorsarneqarsinnaanngitsunik nappaateqarlutillu ajoquteqartarmata nappaataannik suussusiliiniarneq ajornakusoorsinnaasarpoq.
Isummakkut nanertisimaneq nappaataavoq nanertisimajuarnermik sunniuteqarnerusartoq. Nappaat ataatsimik arlalinnilluunniit sunniuteqarsinnaavoq, soorlu:
- Eqqarsarpiarsinnaanngilatit
- Imminut ajorisarputit
- Timikkut ersiuteqarputit
- Nererusussuseqarpianngilatit
- Sinnarluttarputit
- Imminut toqunnissamik eqqarsaateqartarputit
Paasissutissanik pissarsiffik: sundhed.dk
Paasissutissatut quppersagaliat peqqik.gl-imeersut
Peqqik.gl tarnikkut nappaatit pillugit paasissutissiissutitut quppersagalianik 2023-mi saqqummersitsivoq, taakulu ilaanni isummakkut nanertisimaneq suunersoq qanorlu katsorsarneqarsinnaanersoq allaaserineqarpoq.
Paasissutissiissutitut quppersagaliat pillugit annertunerusumik uani paasisaqarnerusinnaavutit:
https://peqqik.gl/Emner/Psykiatri/Informationsfoldere?sc_lang=kl-GL