Tapersiissuteqarnerit
Utoqqarnut innarluutilinnut tapersiissuteqarneq
Naatsumik oqaatigalugu, inuit innarluutillit kommunimit makkunatigut neqeroorfigineqarsinnaapput:
1) inuttaanik namminermik ikiorsiineq
2) angerlarsimaffimmi suliassani nalinginnaasuni pisarialinni tapersersuineq kiisalu
3) nerisaqarnikkut kiffartuussineq.
Tapersiissuteqarneq inunnut innarluuteqarnertik pissutigalugu namminneq taakkuninnga isumaginnissinnaanngitsunut neqeroorutigineqartussaavoq.
Utoqqaq taannaluunniit sinnerlugu pisussaatitaagallartoq tapersiivigineqarnissamik kommunimut qinnuteqaasiortussaapput, kommunelu tassaavoq tapersiisoqarnissaanik aalajangiisussaq.
Tapersiisoqarnissamili pisariaqartitatigut suugaluartutigulluunniit tapersiisoqarsinnaaneq ajorpoq, aamma innarluuteqarneq immini tapersiisoqarnissaanik kinguneqarneq ajorpoq. Inuup innarluutillip tapersiiftfigineqarnissaa pingaaruteqarluinnartutut nalilerneqarpat aammalu inuup taassuma pisariaqartitai piginnaasaalu nalilerneqareeraangata tapersiissuteqarnissaaq akuersissutigineqartarpoq.
Taamaakkaluartorli inuup tapersiiffigineqarnissaminut pisariaqartitai naammassiniarlugit inuup innarluuteqartup innarluutaa, tapersiivigineqarnissamik pisariaqartitai, qanoq annertutigisumik sutigullu tapersiivigineqarnissaa nalilersuiffigineqarluartarput. Tamatumani Inuit innarluutillit tapersersorneqarnissaannut Inatsisartut inatsisaat nr. 13, 12. juni 2019-imeersoq malinneqarluni inuk pineqartoq taannaluunniit sinnerlugu pisussaatitaagallartoq paasiniaavigalugit oqaloqatigineqartarput aammalu pisariaqassappat sulianik ilisimasalinnik naliliisitsisoqartarluni.
Nukinginnartumik tapersiivigineqarnissamik pisariaqartitsineq
Inuk pineqartoq annertunerusumik innarluuteqalerpat tapersiivigineqarnissamillu pisariaqartitsileriasaarpat inuk innarluuteqartoq oqaloqatigeqqaarnagu kommunimi misissuilluni suliaqartoqarlunilu iliuusissamik pilersaarusiortoqartussaavoq.
Utoqqaq innarluutilik sinnerlugu pisussaatitaagallartup suliani isumagisinnaajunnaarpagu alaajangersagaq taanna aamma atuuttarpoq. Taama pisoqartillugu kommunimit piaarnerpaamik oqaloqatiginnittoqarlunilu misissuilluni suliaqartoqarlunilu iliuusissamik pilersaarusiortoqassaaq.
Ataavartumik malitseqartitsineq
Tapersiissuteqarnissaq aalajangiiffigineqareerpat tapersiissuteqarnermi siunertaq naammassineqarsimanersoq paasiniarlugu kommunimit ataavartumik malitseqartitsisoqassaaq. Innuttaasup allatigut tapersiivigineqarnissamik pisariaqartitsinera kommunimit eqqumaffigineqarluni pisussaaffiuvoq.
Innuttaasup tapersiivigineqarnissamik pisariaqartitaa aamma qanoq tapersiivigineqarnissaa aallaavigalugit malitseqartitsinerup qanoq akulikitsiginissaa aalajangerneqartarpoq. Tapersiinerup ilutigisaanik tapersiivigineqartup suliamillu ingerlatsisup akornanni oqaloqatigiittoqarnerani malitseqartitsineq ataavartumik ingerlanneqarsinnaavoq.
Malitseqartitsinerup qanoq malittarisassaqarnissaa qanorlu akulikitsigitinneqarnissaa kommunalbestyrelsimit aalajangiiffigineqarsinnaavoq.
Kommunimit sutigut tapersiisoqarsinnaaneq imaluunniit tapersiisoqartussaaneq pillugit ilitsersuusiami linkimiittumi qupperneq 71-imi atuarneqarsinnaavoq:
Inatsisit