Utoqqaat pillugit oqaaseqartartoq Kiista P. Isaksen Narsami utoqqaat illuanni luuciartoqarneranut atatillugu ullup-qeqqasioqatigiinnissamut qaaqqusaammat utoqqaat najugaqartut nunaqqatiminnik Utoqqaat pillugit oqaaseqartartoqalernertik tipaatsuutigaat.
Utoqqaat pillugit oqaaseqartartup utoqqaat luuciarfigineqartut peqataaffigai, kingornalu najugaqartut ullup-qeqqasioqatigalugillu juullimut poortugarsiassanik poortueqatigigamigit nuannisaqatigeqai.
– Utoqqaat nunaqqatiminnik Utoqqaat pillugit oqaaseqartartoqalernertik tipaatsuutigaat, nuannisaqatigeeqaagullu. Allaat puiortunngortut ilaat ilisarsillutillu ukiut arlallit matuma siorna pisimasunik eqqaamasalikkersaarput, Utoqqaat pillugit oqaaseqartartoq Kiista P. Isaksen oqaluttuarpoq.
Utoqqaat illuanni Luuikasimmi najugallit luuciartoqarneranut aamma Utoqqaat pillugit oqaaseqartartumit pulaarneqarnerminnut atatillugu assuarrapput.
– Utoqqaat illuanni sulisut najugaqartullu oqaloqatigaakka, tikilluaqqusaalluartutullu misigisimavunga. Utoqqaat illuanni silaannaringaarmat paasivara eqqiluisaarneq pingaartinneqartorujussuusoq, taamatuttaaq utoqqaat sulisunit isumassorluarneqarput, Utoqqaat pillugit oqaaseqartartoq oqarpoq.
Utoqqaat pillugit oqaaseqartartoq paasisassarsiorluni nunatsinni illoqarfinnut nunaqarfinnullu angalanissanik pilersaaruteqarpoq, utoqqarnillu naapeqateqanissaminut aaqqissuisoqartarnissaanut qilanaarpoq.
