Naak angallannikkut akimmiffeqarfiugaluartoq utoqqaat pillugit oqaaseqartartoq qarasaasiatigut kiinnerlunilu ataatsimiinnertigut Avannaata Kommuniani utoqqaat atugaannik paasisaqarluarpoq.
Ilulissani utoqqaat illuanni najugaqartut qanigisaallu, sulisut aqutsisorlu ullut pingasut ingerlaneranni utoqqaat pillugit oqaaseqartartumik ataasiakkaaraluni ataatsimeeqateqarnissamut periarfissinneqarnerminni utoqqaat illuanni pissutsinik oqaluttuarluarput.
Taamatuttaaq Ilulissani Uummannamilu angerlarsimaffimmi ikiorteqarnermik atuisuusunik utoqqarnik aamma angerlarsimaffimmi ikiorteqarnermi ataqatigiissaarisunik oqaloqateqarnikkut, minnerunngitsumillu Avannaata Kommuniani najugaqarfinnit 13-iusunit utoqqarnik ataatsimeeqateqarnikkut – kommunip Facebookiatigut Ilulissanilu radiotigut toqqaannartumik aallakaatinneqartukkut – utoqqaat pillugit oqaaseqartartoq Avannaata Kommuniani utoqqarnut atugassarititaasunik paasisaqarluarpoq.
Paaqqutarineqarnissamik pisariaqartitsipput
– Avannaata Kommuniani utoqqarnut atugassarititaasut nunatta sinnerani utoqqarnut atugassaritaasunit allaanerungaanngillat. Utoqqaat inuunerisa sinnerat isumaqarnerulerseqqullugu angerlarsimaffimmi ikiorteqarnermi, utoqqaat illuanni aammalu sammisassaqartitsinermi pissutsit utoqqaat atuisutut pisariaqartitaannut naleqqussarneqartariaqarput.
– Utoqqaat paaqqutarineqarnissaminnik ima pisariaqartitsigaat allaat sulisunit piffissaqarfigineqallatuarlutik oqaloqatigineqaraangamik qujamasuutigisarpaat. Utoqqaallu ataasiakkaat pisarissersuutaannartut misigilersimapput tunuarsimaartunngorlutillu. Ataatsimut isigalugu utoqqaat inuunermik imaqarnerusumik ujartuipput. Assersuutigalugu meeqqanik peqateqartarsinnaaneq eqqaaneqartorlu qiimmaallarujussuartarput, utoqqaat pillugit oqaaseqartartoq Kiista P. Isaksen oqaluttuarpoq nangillunilu:
– Utoqqaat qangatuulli aalassaritsigiunnaarlutillu sulisinnaajunnaarput. Assigiinngitsunik sanngiilliuuteqalersarput ikiorneqartariaqalersarlutillu. Taamaammat utoqqaat suli angerlarsimaffimminni najugaqartut angerlarsimaffimmi ikiorteqarnikkut naleqqussaavigineqartariaqarput, soorlu saagunik taarsiiniarnikkut, oqorutit qaliinik taarsersuinikkut aammalu igalaanik qillersaanikkut.
Kommunimit tusaaniarneqarpoq
Naak ulluni aqqanilinni kommunimut paasisassarsiorluni angalanermi Uummannamut Ilimanamullu angalanissaagaluit piviusunngortinneqanngikkaluartut ataatsimiinnissat isumaqatigiissutaasimasut amerlanersaat piviusunngortinneqarput.
– Isiginnaarutitigut ataatsimiinneq najukkanit tamanit peqataaffigineqarsinnaasoq qilanaarisimaqaara. Naak nunaqarfiit tamakkerneqanngikkuartut ataatsimiinneq uannit utoqqarniillu iluarisimaarneqaqaaq.
– Utoqqaat ulluinnarni akimmiffissalerujussuupput. Utoqqaq ataaseq 80-it sinnerlugit ukiulik angerlarsimaffimmi ikiorteqarnissamut akuerisaasimagaluartoq imminut isumassortariaqartarpoq. Nunaqarfiani arnat angutillu aalisarnermik aalisakkerinermillu suliaqarmata angerlarsimaffimmi ikiorteqarnermi sulisussaqanngilaq. Utoqqaq alla oqaluttuarpoq soraarnerussutisiani ukiut marluk aaqqinnialoorneqarsimasut, utoqqaat pillugit oqaaseqartartoq oqaluttuarpoq inerniliillunilu:
– Naak utoqqaat akimmiffissaqaraluarlutik suli piumassuseqarput, ikioqatigiillutalu akimmiffiusunik aaqqiiniaqatigiinnissarput qilanaaraara. Utoqqaat akimmiffigisartagaat soorunalumi aamma nuannersortaat ilanngullugit angalanermi inaarutaasumik kommunimi akisussaasunut apuuppakka, misigisimavungalu tusaaniarneqarluarlunga.