Narsami utoqqaat ulluinnarni ernummatigisartakkatik pillugit utoqqaat pillugit oqaaseqartartumut Unnuk Kulturisiorfimmi oqaluttuaraat. Utoqqaat pillugit oqaaseqartartoq isumaqarpoq utoqqaat ulluinnarni atugaat oqinnerulersinneqassappata pissutsit assigiinngitsut eqaallisaavigineqartariaqartut.
Utoqqaat pillugit oqaaseqartartup Unnuk Kulturisiorfimmi orninneqarsinnaanerani utoqqaat ilaqutaasullu 50-t missaanniittut alakkaapput. Utoqqaat pillugit oqaaseqartartoq seqersittaat Power Point atorlugu utoqqaat pillugit oqaaseqartartoqarneq pillugu saqqummiivoq, kingornalu utoqqaat atugaat pillugit oqallittoqarluavippoq.
Pissutsit eqarsigaluttuinnartut
– Utoqqaat angerlarsimaffimminni najugaqartut ulluinnarni ernummatigisartakkaminnik Unnuk Kulturisiorfimmi oqaluttuareersullu paasisaqarnerulerpunga. Pissutsit eqarsigaluttuinnarnerat erserpoq, siornatigutullu susassareqatigiinnerput tammariartorpoq, utoqqaat pillugit oqaaseqartartoq Kiista P. Isaksen naliliivoq nangillunilu:
– Aaqqeriaannartut isikkoqarsinnaasut utoqqarnulli ajornartorsiortitsisinnaasut ilaatigut tassaasinnaapput; unnuami anorersuartillugu illora ajoquserpat qanoq iliussaanga aamma ikiortissarsiorlunga sumut saaffiginnissaanga. Utoqqaq ataaseq orlugami qitini annersippaa, nakorsallu angerlarsimaffimmi ikiorteqarnissaanik innersuuppa, ikiorteqartinneqarnissaali piviusunngortinneqanngilaq. Utoqqaat isumaqarput, timikkut eqarsigaluttuinnarnerminni tamakku tungaatigut ikiorneqartariaqaraluarlutik. Pingaartumik aqquserngit quasattut utoqqarni ernumatitsisarput. Illuisa eqqaanni aqqutit illuutillit namminneq siorartertussaammatigit siorarterneqartarunnaarput. Taamaammat utoqqaat ulluinnarni atugaat pitsaanerulersinneqassappata pissutsit assigiinngitsut eqaannerulersinneqartariaqarput.
Utoqqaat pillugit oqaaseqartartoq erseqqissaavoq, Narsami utoqqaat atugaat nunatta sinnerani utoqqaat atugaannut assingusorujussuusut.
– Narsami utoqqaat namminneq peqqitsillutik angerlarsimaffimminni utoqqaliartornissartik ajorinngilaat, taamaattorli utoqqaat amerliartortillugit taakkununngalu sullissisussat ikiliartortillugit ikiortissaasuasarput. Naammaginartumik ikiorneqartannginnamik saaffissaasuasarput, utoqqaat pillugit oqaaseqartartoq oqarpoq.