Siunertarput

Utoqqaat pillugit oqaaseqartartuata utoqqaat inuuniarnikkut atugaasa pitsanngorsarnissaat utoqqaallu qinikkanit inuiaqatigiillu sinnerinit tusarneqarnissaat siunertaraa. Taamaammat utoqqaat pillugit oqaaseqartartuat naalakkersuinikkut pituttorsimanngilaq inatsisillu naapertorlugit utoqqaat inuiaqatigiinni periarfissaannik soqutigisaannillu qulakkeerinnillunilu siuarsaassalluni kiisalu utoqqaat atugaannik sammisaqartitsillunilu paasissutissiissalluni.

Utoqqaat atugaallu pillugit inuiaqatigiinni qaammaasaqarnerulernissaq utoqqaat pillugit qaaseqartartuata sulissutigaa. Tassunga atatillugu utoqqaat pillugit paasissutissanik saqqummiussinissaq, inuiaqatigiinni oqallinnermi utoqqaat sinnerlugit oqaaseqarnissaq utoqqaallu inuiaqatigiinni ineriartorfiusumi sunniuteqarnissaat utoqqaat pillugit oqaaseqartartuata suliassarai.

Utoqqaat atugaannik periarfissaannillu pitsanngorsaanermik iliuusissanik utoqqaat pillugit oqaaseqartartuat siunnersuuteqartarpoq. Kommuninit suliniaqatigiiffinniillu sinniisut utoqqarnik sullissisut utoqqaat pillugit oqaaseqartartuata sulineranut peqataatinneqassapput, naleqquppat periarfissaqarpallu.

Akerlianik utoqqaat pillugit oqaaseqartartuat inatsisitigut iliuuseqarnerni allatigulluunniit utoqqaat atugaannut sunniutilimmik iliuuseqarnerni tusarniaaffigineqartassaaq.

Inatsisartut, Naalakkersuisut, pisortaqarfinni oqartussat allat, suliffeqarfiit namminersortunit pisortaqarfinniillu ingerlanneqartut, soqutigisaqaqatigiiffiit, peqatigiiffiit kiisalu innuttaasut utoqqaat atugaannut tunngassuteqartuni nalinginnaasumik utoqqaat pillugit oqaaseqartartuannit siunnersortissinnaapput.