Utoqqaat illuanni najugaqartunik sisamanik paarsinerlunneq pillugu nalunaarutiginninneq. Utoqqaat pillugit oqaaseqartartup Nuummi utoqqaat illuannut paasisassarsiorluni pulaarnera alianaraluartumik taama kinguneqarpoq. Sulisussaaleqineq, sulisut akornanni napparsimanerit aammalu sulinermi pilersaarutit sukannersut utoqqaat illuanni ulluinnarsiutaasut pissutigalugit najugaqartut paaqqutarineqarnissaannut piffissaqartitsinngillat.
Utoqqaat pillugit oqaaseqartartup utoqqaat illuanni sulisunik pingasunik, najugaqartumik ataatsimik aammalu najugaqartut ilaqutaannik tallimanik oqaloqateqareernerata kingorna utoqqaat illuanni piviusut mersernartut paasineqarput.
Nalunaarutiginninnernit sisamaasunit pingasuni sulisut sulinerminni sukangasuunik malittarisassaqarnerisa kingunerisaanik utoqqaat puiortunngortut nererpiarneq ajornermikkut sanigoraluttuinnartut pineqarput.
Nalunaarutiginninnerit sisamaanni utoqqaq najugaqartoq innarluutilik unnuaannakkut ikiortissarsioraluarluni ilisimajunnaartoq pineqarpoq. Kalerrisaarinermi sianeq inaaniittoq sivisujaamik atorsinnaasimanngimmat aallaqqaammut iniminit siggartaat atorlugu kalerrisaarisimagaluarpoq kingornalu aamma iniminiit meterit qulit missaannik ungasitsigisumiit suaartaraluarlunilu siggartarluni ikiortissarsiorpoq kinguneqanngitsumilli. Angut qiialerami iniminut uterniartilluni torsuusami ilisimajunnaarpoq, aatsaallu peqqissaavimmi ingerlassisup aggersarneqarsimasup attaviginiarsarimmani ilisimmarsimavoq. Kingorna napparsimmavimmut unitsinneqarpoq.
Paarsinerluttoqartussaasariaqanngikkaluarpoq
– Paaqqutarinniffimmi ulloq unnuarlu sulisoqarfiusumi paarsinerluttoqartussaasariaqanngikkaluarpoq. Taamaattorli sulisut misigisimapput sulisussaaleqineq, sulisut akornanni napparsimasarnerit aammalu sulinermi pilersaarutit sukannersut pissutigalugit ulaperulukkiartuinnarlutik. Taamaammat najugaqartut paaqqutarinerlunneqarput, sulinermilu pilersaarutit sukannersut pissutigalugit najugaqartut ataasiakkaat minutsini tallimani quliinnarniluunniit piffissaqarfigineqartarput, utoqqaat pillugit oqaaseqartartoq Inga Egede naliliivoq.
Utoqqaat pillugit oqaaseqartartup utoqqaat illuanni pulaarneranit nalunaarusiami sulisut marluk imminnut attuumassuteqanngitsumik oqaluttuarput, sulisut akissarsiaasa tungaatigut ileqqaarniartoqarnerata kingunerisaanik ilaatigut sulisutut pigaartuutinneqartarnerit sulinermi najoqqutassianit peerneqarsimasut aammalu sulisut immikkoortortakkaat akornanni nuutitsikulasoqarnerulersimasoq.
– Ilaatigut unnuarsiorluni pigaartuusup kiserrammi immikkoortortat marluk ataatsikkut pigaartuuffigisarmagit utoqqaat najugaqartut ikiorneqarnissaminnut utaqqinerulerput, aammalu pigaartuusut paarlatsissaqanngeriarlutik ilaatigut nalunaaquttap akunnerini 16-ini 24-niluunniit ataannartumik sulisariaqartarput. Uanga pissutsit taamaatsillugit ilaquttama arlaannaalluunniit utoqqaat illuanni najugaqalersissallugu toqqissisimanarinavianngilara, utoqqaat pillugit oqaaseqartartoq oqarpoq uparuaallunilu:
– Utoqqaat illuanni sulinermi pisariillisaanerit kingunerluuteqartut uppernarsivarput, tamakkulu innuttaasunit pingaartumillu qinikkanit isiginngitsuusaaginnarsinnaanngillat. Sulisut najugaqartunik paaqqutarinnissinnaanngorlugit sulinermi pilersaarutit siunertamut naapertuutinngitsut pitsanngorsarneqartariaqarput.
Utoqqaat pillugit oqaaseqartartup paasisassarsiorluni pulaarneranit nalunaarusiaq uani atuarneqarsinnaavoq: UANI