Angalanermut tapiissutit
Utoqqarnut angalanermut tapiissutit
Utoqqaat innuttaasut inuttut ataasiakkaatut aamma peqatigiiffinni kattuffinnilu ilaasortaasutut aningaasaateqarfinnut aningaasatigullu tapiissuteqartarfinnut assigiinngitsunut aningaasatigut tapiissutinik qinnuteqaasiorsinnaapput.
Aningaasaateqarfik Den Grønlandske Fond
Aningaasaateqarfik Den Grønlandske Fond Kalaallit Nunaanni avataaniluunniit inuit atugaannik pitsaanerulersitsinissamut, ilisimatusarnermut aammalu piorsarsimassutsikkut siunertalinnut kiisalu Kalaallit Nunaata naalagaaffiullu sinnerani piorsarsimassutsikkut attaveqatigiinnerit siuarsarnissaannut aningaasaliissuteqartarpoq.
Aningaasaateqarfinnut qinnuteqaasiornerni allanisuulli qinnuteqaatit takussutissanik assigiinngitsunik ilaqassapput. Aningaasaateqarfimmit ukiumut marloriarluni agguaassisoqartarnera qinnuteqaasiortussatut eqqumaffigineqassaaq aammattaaq qinnuteqaatit qinnuteqarfissatut ulluliussat kingorna nassiunneqartut nalinginnaasumik itigartinneqartarput.
Aningaasaateqarfik pillugu, qinnuteqaasiornissami tunniussiffissat ullulerneqarneri allallu uani atuarneqarsinnaapput:
Tapiissuteqartarfik borger.dk-miittoq
Aningaasaateqarfiit tapiissuteqartarfiillu ilaat ilaqutaasuni qanigisaasuni toqusoqarsimatillugu inunnut nunatsinnut, nunatsinni aamma nunatta iluani angalanissamut aningaasartuutinik matussusiinissaminnut aningaasaqarnikkut ajornartorsiutilinnut aningaasaliissuteqartarput. Ilaatigut tapiissuteqartarfik borger.dk-miittoq taama siunertaqarpoq.
Tapiissuteqartarfik taanna aqqutigalugu qinnuteqaasiorniartut Danmarkimi Kalaallit Nunaannilu najugaqartut angajoqqaani qitornaniluunniit toqusoqarsimatillugu ilisisoqassatillugulu angalanissamut tapiissutinik qinnuteqaasiorsinnaapput.
Qitornanut imaluunniit angajoqqaanut piartortunut ilaquttatut qanigisaasut aamma angalanissaminnut tapiissutinik qinnuteqarsinnaapput, tamatumanili piartortup qanoq inneranik nakorsamit uppernarsaasiisoqassaaq.
Angalanissamut aningaasatuutissanut tapiissutit qaffasinnerpaaffissalerneqartarput, taamaattoqartillugulu qinnuteqaasiortup aningaasartuutaasinnaasut allat nammineq akilertartussaavai.
Tapiissuteqartarfimmut borger.dk-miittumut qinnuteqaasiorniartut qinnuteqaasiornissaminnut Danmarkimi kalaallit illuini sisamani ikiortissarsiornissaminnut periarfissaqarput.
Tapiissuteqartarfik pillugu uani paasisaqarnerusinnaavutit:
Aningaasaateqarfiit tapiissuteqartarfiillu allat
Aningaasaateqarfiit tapiissuteqartarfiillu assigiinngitsut inuit ataasiakkaat, peqatigiiffiit allallu aningaasanik qinnuteqaasiorfigisinnaasaat PAARISA-p nittartagaani nassaarineqarsinnaapput.
Periarfissat taakku annertunerusumik uani paasisaqarfigineqarsinnaapput: