Tutsarluttunngorneq
Siutip illuinnaani siutiniluunniit illuttut tusaaniarnerit ajortikkaangata tamanna tutsarluttunngornermik taaneqartarpoq. Tutsarluttunngornermi peqqutaasoq apeqqutaatillugu tutsarlunneq qaangerneqarsinnaavoq ataavartunngorluniluunniit.
Utoqqaliartornermi tutsarluttunngoriartortoqartarpoq, tutsarlunnerillu amerlanersaat ukioqqortusinermit aallaaveqartarput.
Tutsarluttunngorneq nalinginnaasuuvoq amerlanerpaat inuunerminni arlaatigut nalaakkumaagaat. Tutsarluttunngoriartortoqartarmat imaassinnnaavoq tutsarluttunngornerit maluginngitsoorsinnaagit. Tutsarluttunngorneq immini navianaateqanngilaq, iliuuseqarfiginngikkaannili kingunerluuteqarsinnaavoq. Taamaammat tusaaniartarneq allanngoriartorpat eqqortumik katsorsarneqarnissaq pingaaruteqarpoq.
Siutip ilorpiaani nujaaqqat sananeqaataat maluginiutaasut nungullariartuleraangata tusillariartortoqalersarpoq. Nujaaqqat sananeqaataat piffissap ingerlanerani innarlerneqariartortarput pinngoqqissinnaanatillu. Tamannaavorlu tusillariartornermut peqqutaasartut ilaat. Aamma tusilartunngorneq kingornuttagaasinnaavoq. Utoqqaliartornermimi tusillariartorneq kingornuttagaavoq. Nipit nipitoorujussuit, soorlu suliffeqarfimmeersut, tusarnaartitsinerneersut imaluunniit siutequtit tusarnaarutit aamma tusillassutaasinnaapput.
Tutsarluttunngorsimavit?
Tutsarluttunngorsimanersutit paasiniarlugu ajornanngitsunnguamik misilittaasinnaavutit. Maluginiaruk:
- Avatangiisini nipiliortoqartillugu oqaatsinik ilisarsiuminaatsitaqartarputit
- Isiginnaarut raadiuluunniit nipittortariaqartarpat
- Inuit katersuuffiini inuit oqaatigisaat tusaarpiartarnagillu immikkoortikkuminaatsissinnaavatit.
Mineqarneq imalunniit siutit nakorsaat
Tusaaniartarnerit ajorsiartorsorigukku nakorsiartariaqalersimassaatit. Tusillarnerit qaangiuttussaanersoq imaluunniit piujuartussaanersoq paasissallugu pingaaruteqarpoq.
Siutini mineqarpallaalerluni siutip sulluani milittoorneq tusillarnermut peqqutaasinnaavoq. Qujanartumillu minik ajornanngitsunnguamik ingerlaannaq piiarneqarsinnaavoq. Tusillavissimaguit siutip nakorsaanut innersuunneqarlutit misissuivigineqassaatit.
Tusillarsimaguit iliuuseqarit
Inuit ilaat tusaaniarnitik ajorsisimagaluaraangataluunniit nakorsiarneq ajorput. Tusillarneq atugaasorujussuugaluartoq ilaatigut paquminartutut isiginiarneqartarpoq, tamannalu ilaatigut iliuuseqarfigineqartannginneranut peqqutaasinnaasarpoq.
Tusillarnerli iliuuseqarfiginngikkaanni kingunerluuteqalersinnaavoq.
Inuit qanoq oqalunnersut tusaarpiartanngikkaanni taamalu paasisanngikkaanni aallaqqaammut uumisoqqajaanermik puffaqqajaanermilluunniit kinguneqartarpoq. Tamatuma kingunerisaanik katerinnernit nigorsimaarneq atuutileraangat kiserliorneq, kisimiikkaluttuinnarneq taamalu pitsaasumik inuuneqarniarneq ajornartorsiutaalersinnaavoq.
Tusillarnerup puiortunngornerullu imminnut attuumassuteqarsinnaanerat misissuinerit ilaasa ersersippaat. Qanoq attuumassuteqarnerat uppernarsineqarsimanngilaq, aamma tusillarneq soorlu tusartaateqartitsinermik katsorsarneqartillugu puiortunngornermik kinguneqanngitsoortarnera uppernarsineqarnikuunngilaq.
Taamaattorli tusillarsimagaanni tusartaateqarnikkut qarasaq sunnersimaarneqartuarsinnaavoq. Taamatuttaaq tusartaateqarnikkut nipit immikkoortikkuminarsillutillu paasiuminarnerusinnaapput.
Taamaammat tusaaniarnerit allanngorsorigukku nakorsiarnissat pingaaruteqarpoq.
Paasissutissanik pissarsiffik: Netdoktor.dk aamma aeldresagen.dk
Tusartaateqalernissamut aningaasatigut ikiorserneqarneq
Tusartaatitaarniarnissannut aningaasatigut tamakkiisumik ilaannakortumilluunniit tapiiffigineqarsinnaavutit.
Perngaammik tusartaatitaassaguit tusartaatinik nalinginnaasunik akeqanngitsunik nakorsaq aqqutigalugu pisaarsinnaavutit. Tusartaat nalinginnaasoq tusillarninnut naammaginartumik ikiorsiissutaasinnaanngippat tusartaatit nalinginnaasuunngitsut nakorsap innersuussineratigut aamma akeqanngitsumik pineqarsinnaapput.
Tusartaatit allat akitigut nikingassutaannik akiliinikkut peqqinnissaqarfimmit aamma neqeroorutitut tunniunneqarsinnaapput.
Inatsisit
(Link)
Peqqinnissaqarfimmi sullissinerit atuisullu akiliuteqartarnerat pillugit Naminersornerullutik Oqartussat nalunaarutaat nr. 5, 15. Februar 2006-imeersoq