Utoqqalinersiaqartitsinermut inatsimmi pilersuisussaatitaanerup atorunnaarsinneqarneragut utoqqalinersiallit ajornerusunik atugassaqalersinneqarnerat utoqqaat pillugit oqaaseqartartup ernummanartoqarsoraa, taamaammallu paaserusuppaa pitsannguutissatut neriorsuutit 16,8 millioner koruuniusut sumut tutsinneqarsimanersut.
Utoqqalinersiaqartitsinermut inatsimmi pilersuisussaatitaanerup inatsisartut ataatsimiinneranni atorunnaarsinneqarneragut utoqqalinersialippaaluit ajornerusumik atugaqalernissaannik maanna kinguneqartitsivoq. Utoqqalinersiallit kisermaat aappaqartullu ikinnerusunik utoqqalinersiaqartinneqalerput.
Ataqatigiinngillat
– Utoqqalinersialik aappalik siornamut naleqqiullugu maanna 1.600 koruuninik qaammammut ikinnerusunik utoqqalinersiaqartinneqalersimasoq ukiortaami sulileratta ulloq siulleq uatsinnut saaffiginnippoq. Paasinarluinnartumik assut paatsuungavoq, isumaqarsimagaluarpormi pilersuisussaatitaanerup atorunnaarsinneqarneragut aningaasanik amerlanerusunik pisartagaqalissalluni, utoqqaat pillugit oqaaseqartartoq Kiista P. Isaksen oqarpoq nangillunilu:
– Kommuninilu attavigisartakkannut sianeqattaarnerup ersersippaa, utoqqalinersialippassuit ikinnerusunik utoqqalinersiaqartinneqalersimanertik pillugu kommuninut saaffiginnittarsimasut. Naak pilersuisussaatitaanerup atorunnaarsinneqarneragut utoqqalinersiallit pitsaanerusunik atugaqalernissaat neriorsuutaasimagaluartoq ajornerusumik inuuniarnerminni atugaqalersinneqarnerat ernumanarpoq.
Utoqqaat pillugit oqaaseqartartoq isumaqarpoq, ajornerusunik utoqqalinersiaqartitsilernerup kommuninut isumaginninnerup tungaatigut aningaasartuutaaleratarsinnaanera pissusissamisuunngitsoq.
– Pilersuisussaatitaanerup atorunnaarsinneqarneragut aappaasup isertitai pissutigalugit utoqqalinersiaqartinneqartup utoqqalinersiai ilanngaavigineqartartussaajunnaarluarput. Naak 16,8 millioner koruunit utoqqalinersiaqartunuinnaq ukiumut pitsannguutissatut Naalakkersuisunit 2024-mi januaarip aallaqqaataanit neriorsuutaasimagaluartut, assigiinngitsunik utoqqalinersiaqartinneqartut atugaat allannguinermi maanna ajorseriartinneqarput. Imminnut ataqatiginngilluinnarput, tupigusuutigalugulu aperiinnartariaqarpunga: sunaana kukkussutaasimasoq aamma aningaasat-uku sumut tutsinneqarsimasut, utoqqaat pillugit oqaaseqartartoq Kiista P. Isaksen aperivoq.