Utoqqaat Illersuisuata allattoqarfianiit paasiniaanermi erserpoq, utoqqaat MitID-mik atuinissamut suli ikiorneqartariaqartut. Utoqqaat Illersuisuat naliliivoq, pisortaqarfinnit amigartumik paasititsiniaasimaneq pissutigalugu utoqqarpassuit MitID atorlugu kiffartuunneqarnissaminnit mattunneqartut.
Utoqqaat MitID-mik suli ajornartorsiuteqarnerat Utoqqaat Illersuisuata Inga Egedep isornartuusoraa.
- MitID-mik atuutsitsinialernermi naammattumik qaammarsaaniuteqartoqannginnera utoqqarnik eqquinerpaavoq. Utoqqat allarpassuartigut akimmiffissaqareerput, maannalu naammattumik paasititsiniaasoqarsimannginnera pissutigalugu pisortaqarfinnit qaavatigut nammakkerneqarput. Naallu utoqqaat ilaat kinaassutsimut uppernarsaatinik qarasaasiatigoortunik atuilereeraluilluunniit MitID-mi suli akimmiffeqartarput. Taamaammat pingaartumik utoqqaat ullutsinni digitaliusumik ingerlatsiffiujuinnartumi imminnut ikiorsersinnaassappata pisortanit eqqumaffigineqartariaqarput, Utoqqaat Illersuisuat Inga Egede oqarpoq.
Pisortaqarfinnit sumiginnarneqarput
Utoqqaat Illersuisuat isumaqarpoq, MitID pillugu nittartakkani attuumassuteqartuni ilitsersuutit naammanngitsut – pingaartumillu utoqqaat amerlanersaat kalaallisuinnaq oqaaseqartuummata mitid.dk-mut qallunaatuinnaq allassimasulimmut innersuussinissaq tulluanngilluinnartoq.
- Allaalluunniimmi utoqqaat ilaasa MitID-mik atuinissaq nalorsarfigingaaramikku periarfissamik tamatuminnga atuerusunngilluinnarput, tassami allamiut oqaasii atorlugit immikkut isertaatilinnik Wi-Fi-inik Apps-inillu ikkussuisoqartariaqarpoq, tamatumalu saniatigut NemID-mut MitID-mullu isertaatit uppernarsaatillu eqqaamaniartariaqarput.
- Utoqqaat NemID-mik atuisinnaanngippata assersuutigalugu aningaaserivinnut ornigullutik aningaasanik nussinermut 50 koruuneertariaqarput, immaqalu pitsorluttuusimagunik taxarlutilluunniit bussertariaqassapput, ilaasalu allaat utoqqalinersiatik ataatsikkut aningaasanngortillugit tigusimagunikkit tillinniarfigitinnissamut navianartorsiortinneqarsinnaapput.
- Utoqqaat MitID-mik ajornartorsiuteqalersillugit kinguaanut allamiullu oqaasii atorlugit nittartakkanut innersuunneqartarnerat pisortaqarfinnit sumiginnaaneruvoq. Taamaattumik utoqqaat pimoorussamik qaammarsaavigineqarnissaat aallartinneqartariaqarpoq, Utoqqaat Illersuisuat Inga Egede oqarpoq.