Nanortalimmi, Narsami aamma Qaqortumi utoqqalinersiallit utoqqaat pillugit oqaaseqartartumik Kiista P. Isaksenimik isiginnaarutit atorlugit ataatsimeeqqaarnerat iluatsilluarpoq.
Nanortalimmi, Narsami aamma Qaqortumi utoqqalinersiallit 100-t missaanniittut isiginnaarutitigut digitaliusutigut utoqqaat pillugit oqaaseqartartumik ataatsimiinnissamik qilanaaruteqarsimaqisumik ataatsimeeqateqarput.
– Utoqqaat amerlasuut ataatsimeeqataapput. Isiginnaarullu atorlugu pernaammik taamatut ataatsimeeqatigiinneq iluatsilluaqaaq. Taamaammat neriuppunga kommunit sinnerisa ataatsimeeqatigeriaaseq taamaattoq aamma atorusussagaat.
– Iluatsilluarnera nuanneqaaq aamma utoqqarpassuit takkullutik ataatsimiinnermi peqataajartorput. Utoqqaat qujamasuttorujussuupput immersorluarneqartutut misigalutik, oqartoqarporlu aatsaat taama soqutigineqartigalutik misigalutik, taamaattumillu sullilluarneqarnissaminnik isumalluarput, utoqqaat pillugit oqaaseqartartoq Kiista P. Isaksen unnersiorpoq.
Siammarluarpoq
Ataatsimiinnermi siullermi utoqqaat pillugit oqaaseqartartup suliai seqersittaat Power Point atorlugu pingaarnertut saqqummiunneqarput, kingornalu apeqquteqarusuttut aperinissaminnut periarfissinneqarput.
– Utoqqaat qaqiligaat soqutiginartorpassuupput, kisianni angerlarsimaffimmi ikiorteqarneq, kiserliortarneq, utoqqalinersiat allallu ataatsimoorussatut saqqummiunneqarput, utoqqaat pillugit oqaaseqartartoq oqarpoq nangillunilu:
– Ukiamut ataatsimeeqqilerutta sammisassat allaanerussapput, taamanikkornissaanullu uanga immersorluarneqareerlunga ilisimasaqarluarnerullungalu peqataajumaarpunga. Ataatsimeereernerup kingorna misigisimavunga utoqqaat pillugit oqaaseqartartutut kujataani siammartorujussuullunga. Utoqqaallu paasissutissanik siammerteriffigineqareerunik attavissartillu paaseriarunikku qularnanngilaq saaffiginnittalerumaarput.