Utoqqaat pillugit oqaaseqartartup allattoqarfiani misilittagaqarlualersimaneq tunngavigalugu allaffissornermi atorfilittatut atorfimmut qinnuteqarusuttut Nuummut nooqqaanngikkaluarlutik atorfininnissaminnut periarfissaqalerput.
Allaffissornermi atorfilittatut atorfimmut qinnuteqarfissaq sapaatip akunneri marlussuit qaangiuppata naassaaq. Qinnuteqarusussinnaasullu illoqarfigisartik qimanngikkaluarlugu atorfimmut qinnuteqarsinnaanerat maanna periarfissiissutigineqarpoq.
– Atorfimmut atatillugu inissaqartitsinnginneq qinnuteqarusussinnaasunut Nuup avataani najugallinnut mattussivoq, tamannalu allanngortikkusupparput. Maanna nunatsinni sumiikkaluartulluunniit atorfimmut qinnuteqarnissaminnut periarfissinneqarlutik illoqarfigisaminni atorfininnissaminnut periarfissinneqarput, utoqqaat pillugit oqaaseqartartoq Kiista P. Isaksen oqarpoq.
Periarfissat digitaliusut
Allattoqarfimmi misilittagaqarlualerneq atorfimmut qinnuteqarusuttunut Nuup avataniittunut periarfissiivoq.
– Uanga Narsami najugaqaraluarlunga atorfilittaralu Nuummi najugaqaraluartoq attaveqatigeeriaatsit digitaliusut iluaqutigalugit allaffeqarfimmik ingerlatsilluarsinnaavugut. Attaveqaatitigut Teamsitigut ullormut arlaleriarluta attaveqatigiilluartarpugut, atorfinikkumaarsinnaasorlu Nuup avataani najugaqartuussappat periarfissaq tamanna atorluarumaarparput, Kiista P. Isaksen oqarpoq.
Utoqqaat pillugit oqaaseqartartoq Kiista P. Isaksen allaffissornermi atorfilittani Teams atorlugit oqaloqatigigaa assimi takuneqarsinnaapput.
Allaffissornermi atorfilittatut atorfik pillugu annertunerusumik uani paasisaqarsinnaavutit: https://job.sermitsiaq.ag/kl/namminersorlutik-oqartussat/suliffissat/allaffissornikkut-atorfilittaq-attaveqatigiilerisinnaasoq