Utoqqaat pillugit oqaaseqartartoq Kiista P. Isaksen Narsami najugaqarluni utoqqaat pillugit oqaaseqartartutut sulissaaq. Tamatumunnga atatillugu nunatsinni kommunit kajumissaarpai, utoqqarnut utoqqaat pillugit oqaaseqartartuannik oqaloqateqarusuttunut ininik ataatsimiinnermilu atortunik utoqqarnut pisariillisaataajumaartussanik periarfisseeqqullugit.
– Nunami isorartoorujussuarmi najugaqarpugut, uangalu utoqqaat pillugit oqaaseqartartutut nunatsinni utoqqaat qanimut attaviginiassallugit periarfissaqanngilanga. Taamaammat kommuninut kajumissaaruteqarpunga ininik ataatsimiinnermilu atortunik utoqqarnut utoqqaat pillugit oqaaseqartartumik sulisuinilluunniit oqaloqateqarusuttunut periarfissiissuteqaqqullugit, Kiista P. Isaksen oqarpoq.
Utoqqaat pillugit oqaaseqartartuata Kiista P. Isaksenip nammineq sulisuni Nuummiittut ulluinnarni Teams atorlugit oqarasuaatitigut isiginnaarutitigullu Narsamiit ataatsimeeqatigisarniarpai. Nammineq atortut taakku kommunimi qinikkatut ukiorpaalunni atorluarsimavai aammalu ungasianiit aqutsinermi sungiusimallugit.
– Eqqarsarpunga, atortut taamaattut utoqqarnut utoqqaat pillugit oqaaseqartartuannik attaveqarusuttunut oqilisaataasorujussuussasut, taamaasillutalu immitsinnut ungasikkaluaqaluta immitsinnut isigiitigaluta oqaloqatigiinnissamut periarfissaqalissagaluarpugut. Assersuutigalugu kommunit innuttaasut sullissiviinit imaluunniit nunaqarfinni kommunip allaffiinit Teams-ikkut ataatsimiissutinik periarfissiisinnaapput, utoqqaat pillugit oqaaseqartartoq kajumissaarivoq.