Kommune Kujallermi utoqqaat aamma utoqqaat pillugit oqaaseqartartoq isiginnaarutitigut attaveqaatit atorlugit maanna attaveqatigiissinnaanngorput. Utoqqaat pillugit oqaaseqartartummi kommunimini utoqqarnik attaveqartalernissaminut atugassanik Kommune Kujalleq attaveqaatinik atugassiisussaq suleqatigiinnissamik isumaqatigiissuteqarfigaa.
– Utoqqaat mobilitik nutaaliaasut atorlugit MitID-mut, e-boks-imut allanullu attaveqarsinnaalernissaannut periarfissiiniarluta utoqqaat Nanortalimmi, Narsami aamma Qaqortumi naapittarfiini internetilersuinissamik suliniut kommunitsinni misissorlugu aallarteqqammerparput. Taamaammat utoqqaat pillugit oqaaseqartartup Kommune Kujallermi utoqqartatsinnik attaveqartalernissaanut isumaqatigiissuteqarnerput tulluartuuvoq, borgmesteri Stine Egede oqarpoq.
Pisussaaffileeqatigiipput
Taamaasilluni utoqqarnut utoqqaat pillugit oqaaseqartartumik attaveqarusuttunut ininik attaveqatigiinnermilu atortunik atugassiinissamut utoqqaat pillugit oqaaseqartartup kommuninut kaammattuuteqarnerani Kommune Kujalleq kommuninit siulliulluni periarfissiivoq.
– Nunarput angalaffigissallugu isorartoorujussuullunilu akisoorujuussuusinnaavoq, taamaammat Kommune Kujallermik suleqateqarnikkut utoqqaallu immitsinnut ungasikkaluarluta kiinnerluta attaveqarsinnaalernerput nuannaarutigeqaara. Attaveqatigiinneq siulleq Nanortalimmi, Narsami Qaqortumilu utoqqarnit peqataaffigineqartussaq februaarip tallimaani pissaaq. Siunertaavorlu isiginnaarutit atorlugit utoqqarnik attaveqartarnerup kommuninut allanut aamma siaruaannissaa, utoqqaat pillugit oqaaseqartartoq Kiista P. Isaksen unnersiorpoq.
Isiginnaarutit attaveqaatit atorlugit utoqqaat pillugit oqaaseqartartup utoqqaallu ataatsimeeqatigiittarnerisigut utoqqarnut akimmisaarutaasinnaasunik annikillisaaniarlutik isumaqatigiissuteqartut isumaqatigiissummi imminnut pisussaaffileeqatigiipput.
Utoqqaat pillugit oqaaseqartartup utoqqaallu ataatsimeeqatigiittarnissaannut Kommune Kujalleq ininik aammalu isiginnaarutitigut ataatsimiissutinik periarfissiissuteqartassaaq, paarlattuanillu utoqqaat pillugit oqaaseqartartoq ataatsimiinnissanik pilersaarusiortartuullunilu ataatsimiinnerit inernerinik Kommmune Kujallermut ilisimatitsissuteqartassaaq.
Ataatsimeeqatigiinnerit nalunaaquttap akunnerini marlussunni sivisussuseqartartussat aallaqqaammut upernaakkut ataasiarluni ukiakkullu ataasiarluni pisassapput.
Atsioqatigiittut assimi takuneqarsinnaapput.