Katsorsarneqarsinnaanngitsumik nappaatit aamma toqusarneq
Innuttaasunik misissuinermi paasisat utoqqaat nappaataannik tikkussisinnaapput. Nappaatit nikerartut arlallit imminnut atassuseraanni apersuinermi peqataasoq ’katsorsarneqarsinnaanngitsumik nappaammik’ atugaqartutut imaluunniit ’peqqissutut’ nalilerneqartarpoq. Nammineq peqqinngitsutut nalileraanni, tusilaraanni, sukkortuugaanni, aakkut qaffasippallaartumik naqitsineqaraanni imalluunniit pualavallaaraanni (BMI 35+) napparsimasutut naliliisoqartarpoq, taamaanngippat peqqissutut (timikkut) naliliisoqartarpoq. Nappaatinit pineqartunit allaanerusunik nappaateqartoqarsinnaammat utoqqaat 77 %-init amerlanerit napparsimasutut nalilerneqarnerat mianersortumik naliliineruvoq.
Ukioqqortusiartorneq ilutigalugu napparsimasut amerlanerulaalerput, taamaattorli nappaatit atugaasut angutini arnanilu assigiinngissuteqanngillat. Tarnikkut nappaatit ilanngutissagaanni utoqqaat 80 %-ii katsorsarneqarsinnaanngitsumik nappateqarlutilluunniit tarnikkut eqqugaasimasuupput.
Kalaallit angutit arnallu 65-inik ukiullit inuuneqqortussusissaattut ilimagisat assigiinngilaarput. Tamatumani angutit ukiukinnerutillutik imminornermik ajunaarnermilluunniit peqquteqartumik toqujaartarnerat peqqutaavoq.
Utoqqaat amerlanersaat inuunermik ilaanni ilaquttaminni qanigisaminnik annaasaqartuusimapput. Taamaammat annaasaqarneq nalinginnaasutut inuunerullu ilagiinnagaatut isigineqartarpoq. Qiimasuunissaq utoqqarni pingaartinneqaraluartoq ilarpaalui misigissutsinik artornarsinnaasunik, soorlu aliasunnermik misigisaqartarput. Utoqqaat akornanni qanigisanik annaasaqarneq pillugu oqaloqatigiittoqartillugu eqqartugassanut allanut sangutitsisoqapallattarpoq.
Paasissutissanik pissarsiffik: Ældre menneskers liv og helbred i Grønland, Statens Institut for Folkesundhed