Avannaata Kommuniata Peqqinnissaqarfiullu akornanni isumaqatigiissut, tassalu Qaanaap illoqarfiani nunaqarfianiillu napparsimasut napparsimanerminni Qaanaami utoqqaat illuanniitinneqartarnissaannik isumaqatigiissut akuersaarneqarsinnaanngilaq. Taamaattumik isumaqatigiissut atorunnaarsittariaqarpoq.Taama isumaqarpoq Utoqqaat Illersuisuat, Inga Egede.
-Qaanaami utoqqaat illuani najugaqartut 15-iupput. 2020-mi maajip aallaqqaataani isumaqatigiissut atuutilermat sulisut utoqqarnik paaqqinnittussatut sulisuusut peqqinnissaqarfimmi sulisut ilinniagaqarsimasut suliassaannik suliakkerneqartalerput, naak sulisut pingasuinnaat ilinniagaqarsimasuusut – ataaseq peqqinnissamut ikiortitut marlullu isumaginninnermi ikiortitut ilinniarsimasuummata. Isumaqatigiissut atuutilermat utoqqat illuani sulisut amerlineqanngillat, taamaattumik isumaqatigiissut atorunnaarsinneqartariaqartoq, aamma Qaanaap napparsimaviani sulisoqarniarnikkut ajornartorsiut allatigut aaqqiiffigineqartariaqartoq Inga Egede oqarpoq.
Utoqqaat illuani ineqartut, sulisut pisortalluunniit isumaqatigiissutip atuutsinniarneqalernerani akuutinneqarsimanngillat, taamaattumik utoqqaat illuani pisortaqatigiit aalajangiinermi qulaatiinnaqarsimasutut misigipput. Taamatuttaaq taakku oqarput ineqartut sulisullumi toqqissimanartinnngikkaat ullut ilaani angerlarsimaffitsik suliffitsillu inunnik arlaqaqisunit najorneqartarmat. Isumaqatigiissutip atuutilerneraniit maannamut inuit uninngasut 60-it 70-illu akorananni utoqqaat illianiitinneqarsimapput. Nunaqarfimmiut Qaanaamut nakorsiartut aqqusaartulluunniit Qaanaamiinnerminni napparsimavimmi unnuisarput utoqqaalli illuani nerisarlutik.
-Utoqqaat illuani najaugartut utoqqaat illuat angerlatsimaffigaat, taakkulu najugaqarnerminnut akiliisarput. Taakku eqqissillutik angerlarsimaffimminniinnissaminnut pisinnaatitaaffeqarput . Taamaattumik akuersaaruminaalluinnarpoq piffissap ilaani napparsimasunik najagateqartariaqartarnerat akuerineqarsinnaanngilaq. Aamma utoqqaat illuani sulisut ulapereersut akissarsiatigut aaqqiivigineqarnatik suliaqarnerulernerat naapertuutinngilaq, Inga Egede oqarpoq.
Avannaata Kommuniani peqqinnissaqarfiullu akornanni isumaqatigiissummi susassaqarfinnut arlariiusunut iluaqutaasumik suleqatigiiffiusinnaasutut nalilerneqarsimapput, suleqatigiissutigineqarsinnaasutulli iluaqutaasussatut nalilerneqarsimasut ineqartunut sulisunullu maannamut iluaqitissartaqarsimanngitsut Qaanaami utoqqaat illuani pisortaqatigiit naliliipput.