Naalakkersuisut periusissiornermikkut suliniutinik aallartinniagaat taamalu utoqqaat sullinneqarnerannik ataqatigiinnerulersitsinikkut utoqqarnik pitsaanerusumik ataqqinassusilimmillu inuuneqalersitsiniarnerat utoqqaat pillugit oqaaseqartartup pisariaqartutut nalilerlugu nuannaarutigaa. Taamaakkaluartoq periusissiaq utoqqaat pilugit oqaseqartartumit isornartorsiorneqarpoq.
Naalakkersuisut siunissaq ungasinnerusoq eqqarsaatigalugu utoqqarnut periusissiornermikkut ajornartorsiutinik 2023-imiit siunissamullu anguniagalersimanerat utoqqaat pillugit oqaaseqartartup maluginiarpaa.
– Naalakkersuisut anguniagaraat; “periusissiami oqaasertaliorneq suliniutillu piffissaq eqqorlugu takutinneqarnissaatinuiaqatigiinnilu naleqqussaanernut pisariaqartunut iluaqutaassallutik.” Ajoraluartumik oqartariaqarpunga; inortuereerpugut. Utoqqaat pisortaqarfinnit assigiinngitsorpassuartigut ikiorserneqartareeraluarlutik timikkut tarnikkullu erloqinartorsiornerat utoqqaat pillugit oqaaseqartartuata allattoqarfeqalerneraniilli paasisaqarfigereerpara, utoqqaat pillugit oqaaseqartartuat Inga Egede oqarpoq nangillunilu:
– Kalaallit Nunaanni utoqqarnik paaqqutarinninneq amigaatilerujussuuvoq. Puiortunngortut, utoqqaat timikkut tarnikkullu nappaatillit, toqujartortut napparsimmavinni paaqutarineqartussaagaluit aammalu nalinginnaasumik utoqqaliartortut akulerussuullugit utoqqaat illuini najugaqartinneqarmata nunatsinni utoqqaat illui paaqqutarinnittarfinngornikuupput. Nalinginnaasumik utoqqaliartortut utoqqaat illuini najugaqartuni ikinnerussuteqalernikuupput. Taamaammat Naalakkersuisut utoqqarnut najugaqatigiiffiliornissaannik pilersaaruteqarnerat qutsatigaara neriullungalu tamatumani nalinginnaasumik utoqqaliartortut pineqarnissaattulli salliullugit iliuuseqarfigineqassasut.
Utoqqaat pillugit oqaaseqartartuat 2022-mi januaarimi allattoqarfeqalermalli utoqqaat pillugit oqaaseqartartuat nunatsinni utoqqarnit ilaqutaasunillu 100-t missaanniittunit saaffigineqarsimalereerpoq. Tamatuma saniatigut utoqqaat pillugit oqaaseqartartuat puiortunngortut illoqarfinni nunaqarfinnilu atugaat pillugit misissuivoq aammalu paasisassarsiorluni angalanermini utoqqaat illuini paasisassarsiorlunilu utoqqarnik ilaqutaasunillu naapitaqarluni siunnersuisarsimavoq.
Utoqqaat nuutitaasarlutillu kaatsitaapput
Naalakkersuisut utoqqaat inuunerannik pitsanngorsaaniarlutik suliniutiginiagaasa ilarpassui utoqqaat pillugit oqaaseqartartup isumaqataaffigai. Pingaartumillu puiortunngortut sammineqarnerat isornartorsiorusunneqarpoq.
– Nunaqarfinni utoqqaat illoqaranilu utoqqarnut naatsorsuussanik najugaqarfeqanngimmat utoqqaat puiortunngortut nunaqarfinniit illoqarfinnut nussorneqarput. Taamaasillutik puiortunngortut ilaquttaminnit avatangiisaanniillu sungiusimasaannit avissartinneqartarput, tamannalu puiortunngortut nappaataannut ajorseriaataasinnaavoq. Puiortunngortoq nuutitaanermi kingorna imminut toqunnissamik toqqaasariaqarsimasoq ilisimasaqarfigaarput, aamma puiortunngortut utoqqaallu ataasiakkaat illoqarfinnut nuutitaagaluarlutik nunaqarfimminnut utertarput kiisalu puiortunngortut ilaqutaalluunniit isumasioqqaarnagit nuutitaaginnartartut ilisimasaqarfigaagut, Inga Egede oqarpoq.
Utoqqaat pillugit oqaaseqartartoq utoqqarnut periusissioqqammerpoq, tamatumanilu suliniutissat Naalakkersuisut suliniutiginiagaannut assingulluinnarput. Utoqqaat pillugit oqaaseqartartoq isumaqarpoq, sulisussaaleqineq suliffeqarfinni tamani atuuttoq Naalakkersuisut siulliit ilaattut ukkatarisariaqaraat.
– Utoqqaat illuini aammalu angerlarsimaffimmi ikiorteqarnermi sulisussaaleqisoqaqaaq, tamatumani kommunit ataasiakkaat aningaasatigut sipaarniarnerannik, sulisussaaleqinermik aammalu sulisut akornanni napparsimasoqartarneranik peqquteqarpoq. Taamaammat sulisut kiserngoruttut utoqqarnut eqquisumik qimunnerusalersarput. Taamaasillunga sulisut suliassarpassuaminnut angummanniartariaqarnerannik peqquteqartumik puiortunngortut pingasut naammattumik nerisinneqarneq ajortut pillugit nalunaarutiginnittariaqarsimavunga. Taamaammat Naalakkersuisut suliniutissaasa aallartinneqannginneranni ajornartorsiutinik maannangaaq aaqqinneqartariaqartunik ulikkaareerpoq, utoqqaat pillugit oqaaseqartartoq tikkuaavoq.