Covid-19´ip tuniluunnerpaaffiani utoqqaat angerlarsimaffiinut iseqqusiunnaarnerit, allaallumi
najugaqartut utoqqaat illuanniit aneqqusaajunaarnerat pillugu, Utoqqaat Illersuisuat sapaatit
akunnerini kingullerni misissuisimavoq. Utoqqaallu kiserliortunngorsinnaanerat piffissami uani
utoqqaat illersuisuata takorloorsinnaavaa:
– Utoqqaat illersorniarlugit kommunit taama iliuuseqarnerat paasilluarsinnaavara,
taamaakkaluartorli utoqqaat angerlarsimaffianniit aneqqusaannginneq ilaquttanillu
pulaartoqaqqusiunnaarneq utoqqarnut kiserliornermik nassataqarsinnaammat erseqqissaatigissavara,
utoqqaat illersuisuat Inga Egede oqarpoq.
2021-imi 60-ileerersimasut 7000-it sinneqarput, taakkunanngalu utoqqaat angerlarsimaffianni
najugaqartut covid-19´imik tunillatsinnginnissaat pillugu kommunit amerlanerpaat utoqqaat
angerlarsimaffiinut avataaniit ilaqutaasunillu iseqqusinngillat. Taamatuttaarlu najugaqartut
utoqqaat angerlarsimaffianniit aninissaat killilersorneqalerluni covid-19´ip tuniluunnerata
nalaani.
– Inuit utoqqalinerminni inunnik takusarnerat killeqalersarpoq, tamannalu qalliinnarlugu utoqqaat
angerlarsimaffiini najugaqartut covid-19 tunngavigalugu killilersuisoqarneranik eqqorneqarput
pulaartoqaqqusaajunnaarnermikkut, utoqqaat illersuisuat Inga Egede oqarpoq nangillunilu:
– Tamanna utoqqaat kiserliornerulernerannik kinguneqarpoq, eqqumaffigineqartariaqarporlu utoqqaat
mattusimanerulernerat ilutigalugu tarnimikkut nanertuutigilersinnaammassuk.
Kommunillu tinnersartariaqarsoraakka utoqqaat mattusimatinneqartut kiserliorpallaalinnginnissaat
pillugu iliuuseqarfigineqarnissaannik, soorlu oqarasuaatikkut qarasaasiakkullu attaveqaatitigut
ilaquttanik qanigisanik oqaloqatiginnissinnaaneq (facebookikkut allatigullu) kommuninit
periarfissisinnaaneq ammaffigineqassasoq, taama utoqqaat illersuisuat siunnersuuteqarpoq.
Naggataatigut Utoqqaat Illersuisuata utoqqaat covid-19´imik eqqugaasut peqqissilluarnissaannik
kissaappai, toqukkullu qimaguttunut ilaqutaasunut misiginneqatiginninnini apuukkumavaa.