Ukununnga;
Aningaasaqarnermut Naalakkersuisoqarfik,
Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoqarfik
Utoqqaat pillugit oqaaseqartartup 2027-mut Aningaasanut Inatsisissamut siunnersuummut oqaaseqaatai.
Utoqqaat amerlasuut aamma saaffiginnittut amerlasuut – kisianni Utoqqaat oqaaseqartartup aningaasalersorneqarnera uninngaannarpoq.
Utoqqaat pillugit oqaaseqartartut ernumassutigaara, 2027-mut Aningaasanut Inatsisissamut siunnersuummi, sinaakkutissatut aningaasaliissutigineqarniarneqartut, ukiut siuliinitut allannguuteqartinneqartinneqanngitsunik siunnersuuteqartoqarnera, ilutigitillugu ikiorseqqullutik, siunnersoqqullutit aammalu oqaaseqartartumik nukittuumik peqarnissamik, piumasaqaataasut annertusiartortillugit.
Kalaallit nunaanni utoqqaat amerliartorput, taamatullu saaffiginnittartut utoqqaat, taakkulu qanigisaat amerliartorlutik. Saaffiginnittartut 300 procent tikillugit qaffariaateqarnikuupput, taamaattoq allattoqarfik marluinnarnik sulisoqarpoq, tassalu Utoqqaat pillugit oqaaseqartartoq, allaffissornikkullu sulisoq ataaseq.
Tamassuma kinguneraa, aaqqissuussaanikkut taama mikitigisumi, aningaasaliissuteqarfiorpianngitsumi, inatsimmillu tunngaveqarluni annertusiartortumik pisariaqartitsiffimmi sulisariaqarneq, taassuma saniatigut, utoqqaat atugaannik oqariartuuteqartussaalluni.
Utoqqaat amerlipput – aamma amerlasuut puigortunngortuunermik eqqorneqarput.
Puigortunngortarneq pillugu annertusiartuaartoqarneranik immikkut ernumanartoqartitsivoq. Utoqqaat amerliartortut puigortunngortuunermik ilisarnaateqartut naammattoortarpavut, sulilu unammillernartuuvoq puigortunngornermik peqqissaartumik utoqqaat qulaajaaffigineqartannginnerat.
Qulaajaaffigineqartarnerup ingerlanneqartannginnera eqqornerusumik tapersersorneqarnissamut sullinneqarnissamut ajornakusoortitsisinnaavoq, utoqqarmut taakkualu qanigisaanut. Aammattaaq puigortunngortuuneq peqqissusermut tunngassuteqaannanngilaq, ataqqinassusermut, najugassaqarnermut, taperserneqarnissamut, iluaqusersuuteqartinneqarnissamut, passunneqarsinnaanissamut, aningaasaqarnikkut kiisalu qanigisaasut piginnaatitaaffiinut aamma attuumassuteqarpoq. Taamaammat pisariaqarpoq suliassaqarfiup ataqatigiissumik suliniarfiginiarneqarnissaa.
Annertusiartortumik, ataatsimoortumik utoqqarnut inatsiseqalernissaa pisariaqartinneqaleraluttuinnarpoq.
2024-mi Utoqqarnut tapersiisarnissamut inatsisissamik tusarniuteqartoqarpoq. Siunertat ilaatigut ilagaat, utoqqaat pisinnaatitaaffiisa ataatsimoortinneqarnissaat.
Pisariaqartipparput inatsisissap suliaralugu naammassineqarnissaa. Ataatsimoortumik inatsiseqalernikkut pisinnaatitaaffiit aammalu pitsaanerusumik sulinneq ingerlanneqalissammat, taamaattoq inatsit kisiat tunngavigissallugu amigarpoq.
Pisinnaatitaaffiit assassaqartinneqanngitsut kingunerinerisinnaavaa pisinnaatitaaffiit allassimaannartut.
Kommunit piumasaqaatinut nutaamut naammassinnissinnaassappata, aningaasanik suliassaqarfiillu nukittorsarneqarnissaanik malitseqartitsisoqartariaqarpoq.
Utoqqaat pillugit oqaaseqartartumik nukittuumik peqarniaraanni nukissanik tunineqarnissaanik malitseqartitsisoqartariaqarpoq.
Utoqqaat pillugit oqaaseqartartup suliassaa tassaavoq, utoqqaat inooqataanermi atugaasa pitsanngortinniarneqarnissaat, aammalu qulakkiissallugu utoqqaat tusaaneqarnissaat, pisinnaatitaaffiisa soqutigisaasalu sammitinneqarnissaat.
Ullumikkut suliniarnitsinni piffissaq annertooq utoqqaat taakkualu qanigisaasa saaffiginnissutaat annerpaamik suliarisarpavut. Tamanna siumut isigisumik suliniarnermut pitsaaliuinissanut killeqartitsivoq, soorlu misissuisinnaanissanut, tunngavilersuinissamut, aaqqissuussinermi suliaqarniarnermut aammalu immikkut suliaqarnissanut killilersuisuusarput.
Isumassanik ajornartorsiutit qaangerniarnissaanut amigaateqanngilagut. Suliniarnermili assannik amigaateqarpugut.
Kalallit nunaanni, allanut attuumassuteqanngitsumik nukittuumillu utoqqarnut oqaaseqartartoqarnissaq kissaatigineqarpat, Utoqqaat pillugit oqaaseqartartoq taamaallaat ajornartorsiutit pioreersut kisiisa sammissanngilai. Ajornartorsiutip pilinnginnerani sulisinnaaneq tunngaveqartumillu aaqqiissutissanik tikkuussisinnaasariaqarpoq, taamaaliornikkut pitsaaliuinermik tapersiisinnaaqqullugu.
Utoqqaat amerliartornerat politikkikkut iliuseqarfigisassaavoq.
Utoqqaat amerliartuinnarnerat uninnavianngilaq. Ilutigitillugu naammattoortarpavut, immikkut saaffiginnissutit allatut suliarisariaqartut, aammalu ikiorserneqarnissamik siunnersorneqarnissamillu pisariaqartitsineq annertusiartorluni.
Taamaammat aalajangiusimassallugu, ukiumiit ukiumut sinaakkutissatut aningaasaliissutit nikisinneqartannginneri naammaginanngillat.
Tamanna pillugu kajumissaaruteqarpunga, 2027-mut Aningaasanut Inatsisissamut tunngaveqarluni nalilersueqqinnissaq, oqaaseqartarfiup aningaasalersorneqarnera suliamut uuttuunersoq, inuaqatigiit naatsorsuutigisaattut naammassineqassappat.
Ilanngullugu Naalakkersuisunut Inatsisartunullu kaammattuutigaara, ataatsimoortumik Utoqqaat taperserneqartarnissaanut inatsisissaq naammassineqarniaqqullugu.
Oqaatsit kusanartut amerlanerit pisiaraqartinneqanngillat. Iliuuseqartoqarnissaanik pisariaqartitsisoqarpoq.
Utoqqaat ataqqisassaraavut, aamma pitsaasumik sullitassaraavut. Utoqqaat amerliartuinnartut pisariaqartitaminnik paaseqqupput, allamik naamik. Puigortunngornermik eqqorneqarsimasut qulaajaaffigineqarnissamut taperserneqarnissamillu pisariaqartitsisuupput. Saaffiginnissutit sammineqarnissaanut nukissamik pisariaqartititsisoqarpoq.
Utoqqaat taamaallaat tusaaneqaannarnissamit pisinnaatitaaffeqartiinnarneqassanngillat. Piviusorsiortumik tusaaneqarnissamut periarfissinneqartussaapput.
Tamanna nukittuumik Utoqqaat pillugit oqaaseqartartoqarnissamut piumasaqaateqarpoq, inatsisitigut utoqqaat pisinnaatitaaffiinik eqquutinneqarnissaannut qularnaarinneqataasumik, – aamma nukissanik piginnaasanillu aaqqissuussaanermut annertunerusumik tunniussaqarnikkut.
Tamaanngippat Utoqqaat pillugit oqaaseqartartoq, tassaalissaaq pokali kusanartoq, imaannanili utoqqaat pillugit oqaaseqartartoq nukittooq Kalaallit nunaata pisariaqartitaa.