Ullumi FN-ip Naalagaaffiit Peqatigiit nunani tamalaani utoqqarnut ullorititaat nalliussivarput. Ulloq una Kalaallit Nunaanni utoqqarnut, ilaqutariinnut, inuiaqatigiinnut aamma ataatsimoorussatsinnut oqaluttuarisaanermullu pingaaruteqartumut immikkut eqqaamannittarpugut.
Utoqqaat asasavut
Ilissi maaniisimanngikkaluarussi uagut, qitornasi, erngutasi kinguaassilu ullumikkut maaniisimanavianngikkaluarpugut.
Ilissi tassaavusi Kalaallit Nunatta ilusilerneqarneranut, pilersinneqarneranut ineriartortinneqarneranullu pilersitseqataasimasut.
Sulisimavusi, akisussaaffinnik tigusisarsimavusi, meeqqanik perorsaasimavusi, allanik ikiuuttarsimavusi aammalu oqaatsitsinnik, kulturitsinnik, ileqqutsinnik naleqartitatsinnillu kinguaariinnut tullinnguuttunut ingerlatitseqqittarsimavusi.
Tamanna pillugu qujassuteqarfigineqartariaqarpusi.
Utoqqalinermut atatillugu inuup inuiaqatigiinni tunniussaqarsinnaanera uninneq ajorpoq.
Utoqqaat amerlasuut suli inuiaqatigiinni akuulluarlutik peqataarusupput, misilittakkatik ilisimasatillu allanut ingerlateqqikkusullugit, nukitik piginnaasatillu inuiaqatigiinnut iluaqutaasumik atorusullugit.
Allalli ulluinnarni tapersersorneqarnissamik, isumassorneqarnissamik ikiorneqarnissamillu pisariaqartitsipput.
Tamanna inuiaqatigiittut ataatsimoorussamik akisussaaffigaarput.
Kikkut tamarmik toqqissisimallutik ataqqineqarlutillu naleqartinneqarlutik inuuneqarsinnaasariaqarput, aamma utoqqaligaanni.
Taamaattumik utoqqaat ataqqillugit, ataqqinassusaat illersorlugit isumassorlugit pineqartariaqarput.
Utoqqaat pisinnaatitaaffii aamma inuit pisinnaatitaaffiinut ilaapput.
Pineqartut tassaaginnanngillat utoqqalinersiat, isumassuineq imaluunniit ulluinnarni ikiorsiineq. Aamma pineqartut tassaapput nammineq aalajangiisinnaatitaaneq, ataatsimoorneq, toqqissisimaneq, tusarneqarnissaq aamma isummersuutit naleqartinneqarnissaat.
Utoqqartatsinnik tusarnaarnerusariaqarpugut.
Ilissi inuunermi misilittakkasi, ilisimasasi oqaluttuarisaanersilu ataatsimoorussatsinnut pingaarutilerujussuuvoq.Taakku kinguaariit tullinnguuttut ilinniarfigisinnaavaat, taamaalillutik suminngaanneernerput aammalu siunissami sumunnarniarnersugut isumassarsiorfigalugu.
Kalaallit Nunaat tassaasariaqarpoq kinguaariit tamarmik inissaqarfiat.
Meeqqat, inuusuttut, inersimasut utoqqaallu tamarmik inuiaqatigiinni ataatsimoorussatsinni peqataasariaqarput.
Utoqqartatsinnik ataqqinninneq tassaavoq aamma oqaluttuarisaanitsinnik siunissatsinnillu ataqqinninneq.
Ullumi Utoqqaat Ulluat nalliussillugu taammaattumik ima oqarusuppunga:
Suliasi pillugit qujanaq. Ilaqutariinnik nunaqqatigiinnillu isumassueqataasimanersi pillugu qujanaq. Ilisimasasi misilittakkasilu kinguaariinnut tullinnguuttunut ingerlateqqittarsimagassigit qujanaq. Aammalu Kalaallit Nunaata ullumikkut inissisimaneranut pilersitseqataaffigisimasarsi pillugu qujanaq.
Tamatta utoqqanngornissarput naatsorsuutigisariaqarparput.
Taamaattumik ullumikkut utoqqaat qanoq pineqarnersut aamma siunissami uagut nammineq qanoq pineqarnissatsinnut tunngaviliivoq.
Kalaallit Nunaanni utoqqarnut tamanut:
Utoqqaat Ulluani pilluaritsi!
Inuiaqatigiinni pingaaruteqarpusi.
Inuunersi pingaaruteqarpoq.
Misilittakkasi pingaaruteqarput.
Oqaatsisi tusaaneqartariaqarput.