MitID-p atuutsinneqalerneraniit qaammat ataasinngunngitsorluunniit innuttaasut amerlasuut kinaassutsimik uppernarsaammik qarasaasiatigoortumik suli peqalinngillat, pingaartumillu utoqqaat amerlasuut susinnaajunnaarsinneqarput.
MitID-mik atuilersitsineq innuttaasunut, innuttaasunut sullissivinnut aningaaserivinnullu kingullertigut akimmisaartitsivoq. Pingaartumik utoqqaat atortorissaarutit tungaasigut inuusunnerumaanit piginnaanikinnerusut ulloq manna tikillugu MitID-mit suli akimmisaartinneqarput.
Utoqqaat Illersuisuata allattoqarfianit utoqqaat peqatigiiffiinut kattuffiinullu paasiniaanermi erserpoq, kommuninit bankinillu MitID-taarnissamut ikiuisinnaannginneq utoqqarnut erloqinartorsiortitsilluni susinnaajunnaarsitsivoq.
– MitID-taarnissamut ikioqqulluta kommunimut arlaleriarluta allagaqarluta saaffiginnissuteqartarsimavugut. Kommune aggertitsiniarluni akisarpoq ataatsimiinnissanili aggertoqarneq ajorpoq. Utoqqarnulli ataqatigiissaarisoq aggerpoq pappillissamillu inatsimmik utoqqaat pisinnaatitaaffiannik imalimmik tunniussilluni, amerlasuullu isingiarsuttuummata uanga peqatigiiffimmi siulittaasutut allatut ajornartumik inatsit pillugu atuffattariaqarsimavakka. Inatsilli qanoq paasineqassanersoq nalugakku inatsimmik atuffassinera iluaqutaangaanngilaq. Saaffiginnittaraluarlutalu itigarneq, itigarneq, Aasianni utoqqaat peqatigiiffianni siulittaasoq Lene Hansen oqarpoq.
Aningaasartuuteqalerput
Lene Hansen oqaluttuarpoq utoqqaat peqatigiiffiat 35-t missaanni ilaasortaqartoq, taakkunanngalu marlussuinnaat MitID-mik atuilersimasut.
– Taamaammat MitID-taarniarnissamut saaffiginnissuteqarusuttut amerlaqaagut. Piumasaqaaterpasuugamik naammassiniagassat. Kommunimilu ikioriarnissaqannginnatta sullinneqarneq kipiinnarneqartarpoq, taamaammat kommunimut saaffiginninnissamut nakernarunnaarpoq, Lene Hansen oqarpoq.
Ikiorserneqarsinnaannginnerlu utoqqarnut aningaasartuuvoq.
– Assersuutigalugu aningaasanik nuussiniarutta bankimut ornigulluta 50 koruuneerlutalu aatsaat nuussisinnaasarpugut, utoqqalinersiagullu kisiisa isumalluutigigatsigit nuussisarneq aningaasartuuterujussuanngorsinnaavoq, Lene Hansen nassuiaavoq.
Kasper Larsen Ilulissani Utoqqaat Peqatigiit-ni siulittaasuusoq MitID-taarsimasut iluatsitsisimasut ilagaat, taamaakkaluartorlu suli akimmiffissaqartuarpoq.
– Nuliaralu MitID-taarniarnerput ilungersunarsimavoq, qujanartumilli aningaaserivitsinnit ikiorneqarpugut. Taamaakkaluartorli MitID-mik atuiniarluni malinnaaniapiloornarpoq, tassami isertaatinik naqittaanermi kukkusimagutta bankimut saaffiginnilluta ikioqqusariaqartarpugut. Pingaartumik sapaatip akunnerata naanerani aningaasanik nuussiniarnermi naqittagassatigut kukkusimagutta allatut ilioriaqqissinnaajunnaarluta ataasinngornerunissaanut bankimit ikiortinnissatsinnut utaqqisariaqartarpugut, Kasper Larsen oqarpoq.
Qaammarsaaniuteqartoqarnissaanik ujartuivoq
Kattuffik Utoqqaat Nipaat-ni siulittaasoq Jensine Ottosen akimmiffiusartunik taakkartorneqartunik ilisarsilluinnarpoq.
– Amerlavugut sumiiffinniit sumiiffinnut innersuunneqartuartut, kiisa imaalivoq, utoqqarpassuillu suli MitID-taarsimanngillat – kiisa qasunarsivoq. Pisortaqarfinniit oqaannarsinnaanngillat MitID-taarnissamut nalornigutta kinguaatsinnit ikiorneqaannarsinnaasugut. Pisortaqafiit-uku namminneq MitID pilersitarigamikku qaammarsaaniuteqarnissaq akisussaaffigisariaqaraat.
– Pingaartumik utoqqaat atortorissaarutit tungaatigut pikkorinngillat, amerlasuullu interneteqanngillat. Pisortaqarfinnit atortorissaarutit tungaasigut ingerlatsineq atugaajartuinnartillugu pingaartumik utoqqaat qaammarsaaniuteqarfigineqarnissaat pisariaqarpoq, Jensine Ottosen Kattuffik Utoqqaat Nipaat-ni siulittaasoq oqarpoq.